O PSOE cuestiona o interese da Xunta pola transparencia tras un convenio en Vigo

O deputado socialista Abel Losada puxo en cuestión o “súbito interese” da Xunta pola transparencia, tras o convenio que asinou este luns en Vigo o vicepresidente da Administración autonómica, Alfonso Rueda; e reclamoulle que lla aplique “á Xunta, porque alí –hai– problemas de transparencia cara á oposición”.

Así, puxo como exemplo “a conxelación” da comisión de investigación sobre a fusión das caixas como consecuencia da maioría absoluta do PP, así como a “inxente cantidade de información” que o grupo socialista reclamou ao Goberno galego sobre distintas cuestións e das que obtivo “a calada por resposta”.

“Transparencia cero”, resumiu, antes de insistir en que Rueda “tería que empezar analizando as necesidades de levar adiante a lei de transparencia autonómica, promulgada por un goberno presidido por un socialista, e que o señor Feijóo nas dúas lexislaturas que leva gobernando en Galicia literalmente ten esquecida”.

Losada tamén trasladou a súa sorpresa porque a sinatura deste acordo tivera lugar na cidade de Vigo –na sede da universidade–, xa que, remarcou, o concello vigués é o que ten “maior índice de transparencia de toda Galicia”.

Segundo dixo, de acordo coas análises de transparencia internacional, Vigo ten unha puntuación de 95 sobre 100, “e nalgúns parámetros como transparencia económica e financeira, urbanismo e obras públicas, obtivo a máxima puntuación posible”.