O Partido Popular insiste en que a súa aposta é lograr un informe técnico incontrovertido do accidente

O voceiro parlamentario do PPdeG, Pedro Puy, insistiu na súa aposta por que se elabore un informe “técnico incontrovertido” sobre o accidente ferroviario do Alvia en 2013 debido ao que faleceron 80 persoas e máis dun centenar resultaron feridas. En canto a dirimir responsabilidades políticas, dixo que o foro para tratar este asunto son as Cortes Xerais.

A preguntas dos medios en rolda de prensa, e a uns días de que se cumpra o terceiro aniversario do sinistro na curva da Grandeira, Pedro Puy defendeu que os populares apostan por un informe técnico para coñecer as causas do accidente, o que “non exclúe” unha sentenza xudicial.

“As responsabilidades políticas, no seu caso, nas Cortes Xerais,”, respondeu Puy Fraga ao respecto desta outra rama que os grupos da oposición, coa salvidade do PSdeG, queren que tamén teña o seu reflexo na Cámara galega cunha comisión de investigación propia.

Non obstante, o dirixente popular insistiu en que as competencias para investigar o accidente non lle corresponden a Galicia, son “exclusivamente estatais”, e argumentou que os propios grupos que a volveron pedir recoñeceron que era unha cuestión “simbólica”, toda vez que a Cámara está a punto de disolverse para a convocatoria das eleccións autonómicas.

Así, Puy apelou ao seu respecto institucional polas demais cámaras, máis alá da súa opinión persoal, para manifestar que “é unha cuestión que corresponde dilucidar” nas Cortes se se constitúe ou non unha comisión de investigación do accidente acontecido en Angrois. Por iso, dixo, votouse “non” á comisión de investigación que “os propios” que a piden recoñecen que sería “inoperativa”.

En todo caso, reivindicou que o PPdeG, co seu presidente á cabeza, Alberto Núñez Feijóo, reclama “un informe incontrovertido” que “non é exactamente a mesma opinión que poidan ter compañeiros de militancia noutras latitudes”.