O Foro Industrial da Eurorregión pon en relevo a cooperación como clave para o sector metalúrxico

O Foro Industrial de Internacionalización e Innovación na Eurorregión, celebrado este venres en Vigo, apuntou á cooperación na rexión de Galicia e o norte de Portugal como factor “clave” para o sector metalúrxico, no obxectivo de fomentar a súa competitividade e crear emprego aos dous lados da fronteira.

Nesta liña, o vicepresidente da Federación Luso-Galaica de Industriales Metalúrgicos (Feluga) e presidente de Asociación de Industriais Metalúrxicos de Galicia (Asime), Julio Gómez, chamou a Galicia a “non deixar de colaborar con Portugal, atopando o beneficio de traballar conxuntamente”.

“As empresas debemos beneficiarnos de formar parte desta Eurorregión e facer o posible por eliminar as barreiras e ampliar o ámbito de actuación, tendo en conta a importancia da internacionalización para ampliar a capacidade empresarial”, sostivo, antes de apuntar que o metalúrxico galego demostrou no último ano que “empeza a súa recuperación”.

Neste contexto, o presidente de Feluga e da Associacâo dous Industriais Metalúrgicos, Metalomecãnicos e Afins de Portugal (Aimmap), Aníbal Campos, mencionou o labor da Federación Luso-Galaica, que promove iniciativas conxuntas orientadas á internacionalización, a competitividade e a innovación, que cualificou como “eixes fundamentais”.

Pola súa banda, tamén o vicepresidente da Comissão De Coordenação E Desenvolvimento Regional Do Norte (CCDR-N), Carlos Neves, considerou que o “grande obxectivo” é “intentar facer un bo exercicio de cooperación” para que nun “futuro, as industrias galega e portuguesa se poidan integrar” nos distintos sectores.

POLÍTICA INDUSTRIAL

Na súa intervención, o alcalde de Vigo, Abel Caballero, apuntou que Europa “ten que xirar a súa forma de facer política”, e en concreto “xirar a súa política económica e política industrial”, porque “non chega coa política de innovación”. “Non é suficiente, porque temos que competir con países que fan políticas industriais,”, rematou.

Na mesma liña, a presidenta da Deputación de Pontevedra, Carmela Silva, destacou que “o futuro de Europa, España, Galicia, Pontevedra e Vigo pasa por fomentar a industria”, que é “a que mellor aguantou esta crise”, para o que chamou ás distintas rexións a facer “un enorme esforzo por dedicar recursos abondos aos grandes plans industriais”.

O delegado da Xunta en Vigo, Ignacio López-Chaves, finalmente, puxo en valor as vantaxes que ten a cooperación transfronteiriza, e subliñou que esta rexión europea é “unha oportunidade para galegos e portugueses”. Así, animou a “buscar unha Eurorregión máis competitiva”.

PROXECTO ‘CIME’

O director xeral de Feluga e secretario xeral de Asime, Enrique Mallón, destacou que un dos programas “estrela” no impulso da Eurorregión é ‘Cime’, un proxecto de “cooperación intelixente e mellora da competitividade das empresas galegas e portuguesas”.

Segundo explicou, trátase dunha estratexia en materia de internacionalización pola que se fará unha axenda de colaboración pública-privada, unha plataforma web, ciclos, xornadas, misións inversas, unha unidade de vixilancia competitiva e accións para fomentar o ‘networking’, a innovación sectorial e o acceso rápido a mercados exteriores, entre outras medidas.