O conselleiro de Cultura apela á concordia e á unidade para construír o futuro en democracia

Román Rodríguez na intervención durante a apertura do congreso. Foto: X. Crespo

O conselleiro de Cultura, Educación e Ordenación Universitaria, Román Rodríguez, participou hoxe na apertura do congreso internacional ‘1936. Un novo relato? 80 anos entre historia e memoria’, un encontro que ten como obxectivo revisar o relato da Guerra Civil española pasadas oito décadas do inicio do conflito e unha vez consolidada a democracia en España.

Durante a súa intervención o titular do departamento educativo da Xunta de Galicia apelou á concordia e á unidade “para poder seguir construíndo o futuro baixo estes parámetros de calidade”, nomeadamente os que fan que a actual democracia española sexa homologable ás máis avanzadas do mundo en nivel de cotas de liberdade e progreso e de servizos públicos de calidade como a educación e a sanidade. Neste sentido o conselleiro lembrou que estes últimos 40 anos constitúen o mellor período da nosa historia contemporánea, e un sistema a conservar e potenciar.

Román Rodríguez quixo felicitar aos comités organizador e científico deste congreso por convocar un encontro que ha servir para afondar nos valores da liberdade, do respecto, da concordia e da importancia de convivir pese ás diferenzas. Asemade sinalou que debates como o que se vai producir neste foro son produtivos para deixar atrás calquera visión intolerante ou totalitaria e para “buscar os puntos que nos unen, e non os que nos dividen, desde o respecto mutuo”, para que “o moito que temos acadado como sociedade non se perda”.

Ademais do conselleiro participaron na inauguración o reitor da Universidade de Santiago de Compostela, Juan Viaño; o decano da facultade de Xeografía e Historia, Juan Manuel Monterroso Montero; e o alcalde de Santiago, Martiño Noriega; entre outras autoridades, membros dos comités organizador e científico do congreso, alumnos e relatores participantes.

O congreso desenvolverase ata o mércores na facultade de Xeografía e Historia da Universidade de Santiago de Compostela, día no que se pechará ás 19 horas cunha conferencia no Teatro Principal de Ben Kiernan (Yale University) arredor da historia dos xenocidios.