O alcalde da Coruña esixe á Xunta un compromiso maior coa estación intermodal

O alcalde da Coruña, Xulio Ferreiro, reclamou á Xunta un “compromiso maior” coa futura estación intermodal da cidade e lamentou que o “esforzo” que se lle pide ao consistorio herculino é “maior” que a outras cidades galegas.

Así o indicou, en rolda de prensa, tras a reunión mantida este martes en Madrid no Ministerio de Fomento con representantes do Goberno local, do autonómico e Adif.

O alcalde destacou que “só houbo un pequeno avance” xa que a entidade pública ferroviaria está disposta a ceder o terreo da estación a cambio de parte da xestión do aparcadoiro pola que Adif obtería un beneficio próximo ao millón de euros.

Con todo, lamentou a posición da Xunta, a quen pide que faga un esforzo proporcional” coa futura estación intermodal da Coruña.

“O esforzo que se lle pide ao concello da Coruña é maior que a calquera outro concello de Galicia para ter a súa estación intermodal”, apuntou Ferreiro, que tamén subliñou o “maior esforzo” que está a realizar o consistorio herculino, disposto a destinar 5,8 millóns a esta infraestrutura.

Neste sentido, Ferreiro advertiu que non permitirá que o concello da Coruña “financie esta obra nunha proporción maior que outros”, posto que ademais as peculiaridades da mesma fan que non sexa comparable coa intermodal en Santiago, Ourense ou Vigo.