Noriega defende o posicionamento proactivo dos alcaldes para impulsar a marea

O alcalde de Santiago, Martiño Noriega (Compostela Aberta), defendeu que os tres rexedores das mareas das cidades galegas decidisen dar un paso á fronte público para facer un chamamento á unidade na confluencia, un “posicionamento proactivo” en aras de contribuír ao proceso para que se poidan “cambiar as cousas” no país.

“O que imos é a escenificar un posicionamento proactivo de tres Alcaldías que teñen carga simbólica no proceso e que entenden que o proceso da marea pode optar a cambiar as cousas no país”, manifestou en declaracións aos medios.

Preguntado pola metodoloxía para elixir candidato da confluencia, Noriega insistiu en que el defende que “o proceso ten que ser participado” e que as primarias “teñen que estar”, pero non son “incompatibles” con buscar un espazo de “consenso”.

Noriega dixo que non quería “entrar no debate de candidatos”. “Paréceme que non suma e, en todo caso, é o proceso o que ten que elixir o candidato”, aseverou.

Sobre o chamamento conxunto, o rexedor compostelano insistiu en que é un “ano histórico” con “posibilidade de cambio” e, por iso, é importante impulsar o “proceso, nunca contra ninguén, sempre falando de pluralidade”.