Absolven ao exalcalde de Castro de Rei e todos os acusados de adxudicacións irregulares na “Operación Rey”
O exalcalde de Castro de Rei (Lugo), Juan José Díaz Valiño, e os restantes acusados na coñecida como Operación Rey, que investigaba supostas adxudicacións irregulares nesta localidade lucense, foron absoltos de todos os cargos pola Audiencia Provincial de Lugo.
Así o recolle a sentenza feita pública este martes e que explicita a “nulidade” das escoitas telefónicas das que foron obxecto os acusados, que sustentaban as acusacións.
Neste sentido, a Sala cre que non hai “razóns” que puidesen “permitir entender que se estaba a cometer ou se ía cometer algún tipo de ilícito penal”, polo que “as primeiras intervencións telefónicas que se acordaron nesta causa carecían do presuposto habilitante esixido jurisprudencialmente, o que determina a súa nulidade”.
Consecuentemente, a nulidade do auto polo que se autorizaron as mesmas “determina a produción do mesmo efecto en todas aquelas outras probas directa ou indirectamente relacionadas e derivadas” destas escoitas.
“Resolta a nulidade das intervencións telefónicas practicadas na causa, na súa integridade, a declaración de feitos probados faise con fundamento na inxente proba documental obrante en autos e nas probas de carácter persoal, interrogatorios de acusados e testificales”, recolle a sentenza, que, unha vez analizadas estas probas, conclúe que os acusados deben ser absolvidos.
Para a sala “non existe proba válida dos feitos na forma que foron obxecto das acusacións”, xa que os feitos acreditados “non son constitutivos de ningún tipo de infracción penal”, di o auto.
“Non existe proba ningunha de que os acusados decidisen previamente o adxudicatario e, aínda sen que conste a súa participación delituosa, actuasen para conseguir esa adxudicación”, afonda.
OPERACIÓN REY
A Fiscalía acusaba o exrexedor de Castro de Rei dos delitos de tráfico de influencias, prevaricación administrativa e suborno, uns feitos polos que pedía 10 meses de carcel, inhabilitación e multa.
Así mesmo, para o que era tenente de alcalde e que continúa como edil Roberto Lorenzo, e para o exconcelleiro Antonio Beado, o Ministerio Público pedía nove anos de inhabilitación para cargo e emprego público por un delito continuado de prevaricación administrativa.
Finalmente, para a secretaria municipal María José F.L. mantiña a acusación de falsidade en certificado, pola que pedía seis meses de suspensión de emprego en cargo público. A Fiscalía retirara nas súas conclusións definitivas as acusacións contra a exconcelleira Ana Mato.
Esta operación, que investigou supostas adxudicacións dos anos 2008 e 2009, sentou no banco hai un mes a oito acusados, todos eles absolvidos: o exalcalde, Juan José Díaz Valiño, o tenente de alcalde Roberto Lorenzo (naquel momento con Terra Galega e actualmente co PP), dous exconcelleiros -Antonio Beado e Ana María Canto-, a secretaria municipal María José F., un enxeñeiro, un arquitecto e un empresario.