A Deputación da Coruña promove a profesionalidade da atención turística en máis de cincuenta concellos

Máis de cincuenta concellos de menos de 50.000 habitantes da provincia son os beneficiarios da liña de axudas da área de Turismo da Deputación para contratar informadores e informadoras turísticas creada co fin de contribuír de forma decidida á profesionalidade do sector.

Un total de 52 concellos, dos cales 6 fixérono de forma agrupada, concorreron á nova liña de subvencións da área de Turismo da Deputación da Coruña dirixida a contratar informadores e informadoras turísticas para os concellos de menos de 50.000 habitantes.

“Esta nova liña contribuirá á profesionalidade do sector turístico tamén en concellos medianos e pequenos que sen este apoio da Deputación non poderían contratar persoal especializado para un sector de vital importancia como é o turístico”, sinalou o deputado responsábel da área, Xosé Regueira.

Os obxectivos da convocatoria son, por un lado, potenciar a proxección do turismo nos concellos e, polo outro, a creación de novos postos de emprego para persoal formado especificamente en materia de turismo. O fortalecemento das oficinas de turismo con persoal durante a tempada alta, ademais de poder alongar no tempo o persoal adicado a estas actividades de promoción local é unha das liñas de especial interese para o departamento de Turismo da Deputación da Coruña.

A esta primeira convocatoria, que se resolverá en breve, presentáronse un total de 52 concellos. Vilasantar, Boimorto e Sobrado por unha banda e Val do Dubra, Negreira e A Baña por outro optaron á subvención de forma agrupada, sumando esforzos de concellos de pequena dimensión co fin de ofrecer de maneira conxunta o servizo profesionalizado.

O reparto de orzamentos da convocatoria responde a criterios obxectivos, valorando en grande medida o esforzo que os pequenos concellos realizan para promover, poñer en valor e difundir o seu territorio cunha partida orzamentaria, oficina de turismo e plans de accións turísticas propias.
Nesta primeira convocatoria, a área de Turismo adxudicará subvención a todos os concellos que se presentaron cun reparto que se dará a coñecer na resolución que se fará pública nos vindeiros días.