A defensa do asasino de Lupe Jiménez alega arrebato para lograr unha rebaixa da pena de prisión

A defensa do asasino de Lupe Jiménez alegou este martes na vista de apelación ante o Tribunal Superior de Xustiza de Galicia (TSXG) que o seu cliente cometeu o crime durante un “arrebato” e reclamou que se lle rebaixen os 20 anos de prisión aos que foi condenado.

Así, o letrado da defensa pediu que se cualifique o delito como un homicidio e se lle rebaixe a pena imposta a José Luís Cortiñas, que foi condenado por asasinato en marzo deste ano pola Audiencia de Pontevedra.

O xurado popular considerou probado por unanimidade que o acusado golpeou repetidamente na cabeza á vítima e que lle asestou tres puñaladas no pescozo, unha na boneca e doce na rexión anterior do tórax, producíndolle a morte de forma inmediata

Na vista, na que non estivo presente o acusado, que a seguiu mediante unha videoconferencia, a defensa sostivo que non existiu “aleivosía sorpresiva” na actuación do seu cliente e, en base a este argumento, solicitou que os feitos sexan cualificados como homicidio e non como un delito de asasinato, o que motivaría unha rebaixa na pena de prisión.

“Non hai acto sorpresivo”, dixo o letrado, que revelou ademais que o condenado e a vítima discutiran e que, no momento dos feitos, o home estaba nun “estado de perturbación” tras decatarse que o fillo que esperaba a vítima non era seu. En base a estes argumentos, a defensa busca rebaixar a 15 anos a pena de prisión.

Tras a exposición do avogado, tomou a palabra o fiscal que, xunto coa acusación particular da familia de Lupe Jiménez, apoiaron a sentenza e insistiron no ensañamiento.

FISCALÍA E ACUSACIÓN

Así, a Fiscalía reiterou que o ataque do condenado “foi sorpresivo” e que a vítima “non puido defenderse”. “Bastaría unha lectura imparcial para concluír que o xurado declarou por unanimidade que a vítima non tivo oportunidade de defenderse”, apuntou.

Así mesmo, fronte ao que sostén o asasino, o fiscal considera que “non é crible” o estado de perturbación e que non está probado que houbese unha discusión previa entre o condenado e a vítima.

Por todo iso, tanto Fiscalía como acusación particular solicitan que se manteña a sentenza ditada no seu día pola Audiencia Provincial de Pontevedra, e que condena a José Cortiñas a 20 anos de prisión polo asasinato da súa muller.