Vázquez Almuíña afirma que está aberto ao diálogo pero mantén que o déficit crónico de camas en Vigo desapareceu

O conselleiro de Sanidade, Jesús Vázquez Almuíña, afirmou que o seu departamento e o Servizo Galego de Saúde (Sergas) están “sempre abertos” ao diálogo, tanto cos pacientes coma cos traballadores, pero mantivo que “o déficit crónico que tiña antigamente a área de Vigo en camas “desapareceu”.

Así pronunciouse durante unha visita ao Hospital Povisa, ao ser preguntado polas protestas de traballadores do Complexo Hospitalario Universitario de Vigo (Chuvi), que esta mesma semana iniciaron un encerro no Meixoeiro para denunciar o peche de camas e o “desmantelamento” deste centro e para esixir unha reunión co conselleiro e o xerente, Félix Rubial.

Acerca desta cuestión, Vázquez Almuíña defendeu que se alguén se “reuniu” cos traballadores, “en comparación con outros conselleiros”, foi el; pois tivo encontros con eles “ao cuarto día de tomar posesión” e reuniuse con SOS Meixoeiro “en máis dunha ocasión”.

“Nunca pechamos o diálogo, queremos estar en contacto continuo, pero queremos discutir as cousas que realmente benefician ao cidadán e tamén ao traballador”, apostilou, antes de insistir en que “discutir se -hai- que abrir camas por abrir, non”.

Almuíña dixo que na área viguesa hai “un número de camas superior” que permite cubrir “perfectamente” a demanda nos picos de inverno, “cando hai moitos máis ingresos, e neste sentido reiterou que “dende logo ningún paciente de Galicia vai ter ningún problema se necesita hospitalización”.

Non obstante, apuntou que hoxe en día cada vez hai máis cirurxía ambulatoria, as estanzas son inferiores e hai “moitas máis prazas en hospitais de día. “Polo tanto, a cama non é tan importante como era no pasado, e o que temos que loitar é por mellorar e dar máis servizos e non discutir se se fai en cama, en hospitalización ou en zona ambulatoria”, concluíu.

PLANIFICACIÓN

O conselleiro, que insistiu en que en verán “a incidencia de ingresos hospitalarios é moito menor a outros meses”, tamén reparou en que o Sergas ten que facer unha planificación de acordo coa actividade, polos propios pacientes “e tamén polos traballadores, que piden o seu período de vacacións lóxico e razoable”.

“Planificar o verán para adecuar os medios, facer a inversión máis axeitada, e planificar o traballo laboral e as vacacións” dos profesionais, explicou, antes de reiterar que “se non hai pico de alta demanda por ingreso, os traballadores -son redistribuídos- de forma planificada”.