Queda libre aínda que investigado por lesións un mozo detido tras agredir cunha arma branca a outro en Moaña

Un mozo detido o domingo tras atacar a outro en Meira, na localidade pontevedresa de Moaña, quedou en liberdade, aínda que ten a condición de investigado por un suposto delito de lesións, segundo informaron fontes do TSXG.

Os feitos aconteceron a primeira hora da mañá do domingo na zona urbana da parroquia de Meira. Os veciños alertaron á Garda Civil ao presenciar unha pelexa, e comprobar que un dos implicados estaba ferido e sangraba.

Fontes da investigación explicaron que, horas antes, unha rapaza (exparella do detido) denunciara a Kevin por un suposto delito de violencia de xénero, e volvérase á casa en compañía dun amigo.

Cando chegaron ao domicilio, o exnoivo estaba alí e iniciouse a pelexa, na que o amigo dela resultou ferido por arma branca, polo que tivo que ser evacuado en ambulancia ao Hospital Álvaro Cunqueiro de Vigo, aínda que as súas feridas non eran graves.

Por estes feitos, Kevin B.G. foi detido e, tras comparecer ante o xulgado de instrución número 3 de Cangas, en funcións de garda, foi posto en liberdade, investigado por un suposto delito de lesións.