O PSOE de Ourense recorrerá ante a Xunta Electoral o acto do convenio da intermodal

O PSOE de Ourense confirmou que presentará unha denuncia ante a xunta electoral de zona pola firma na tarde deste mércores dun convenio de colaboración entre Xunta, Fomento e o Concello para o desenvolvemento da Estación Intermodal da cidade, que contará coa presenza da ministra de Fomento en funcións, Ana Pastor.

A oposición coincidiu en cualificar a firma como un “acto electoralista”, mentres que o alcalde defendeu que “a xestión ten que continuar” independentemente de que haxa eleccións e animou a quen detecte que “non é oportuno” acudir ante a Xunta Electoral.

O portavoz socialista Ángel Vázquez Barquero asegurou que o seu partido presentará unha denuncia á Xunta Electoral de zona polo que considerou como “un feito gravísimo” e “un acto electoral evidente” que se realiza a catro días da votación”.

Para Vázquez Barquero, a firma do convenio de colaboración prevista para esta tarde entre a ministra de Fomento en funcións, Ana Pastor; a conselleira de Infraestruturas e Vivenda, Ethel Vázquez e o alcalde de Ourense, Jesús Vázquez, é un acto “electoral” e “ilexítimo”.

BARQUERO: “TIÑA QUE HABERSE ASINADO EN ABRIL”

Vázquez Barquero lembrou que o convenio, que “tería que asinarse en abril”, tal e como o prometeu” o alcalde, “chega en plena campaña electoral”. “Agora comprendemos o motivo da demora”, dixo.

Pero ademais de criticar o carácter “electoral” deste convenio, Barquero insistiu en que se trata dun “acto ilexítimo” porque o alcalde “vai asumir compromisos urbanos e económicos con Adif” sen contar co respaldo do pleno.

Neste sentido, considerou que “o único órgano” que pode asumir ese tipo de compromiso é o Pleno, e lembrou que no último Pleno “a posición maioritaria da cámara” foi a de rexeitar un convenio marco “da mesma natureza” con Adif e Fomento.

“O alcalde de novo se pliega ante os intereses do seu partido político e búrlase dos cidadáns”, concluíu Barqueiro, que insistiu en que Vázquez “compórtase como un señorito que pretende xestionar a cidade coma se fose o seu casarío”.

“CANDO MENOS SOSPEITOSA”

O portavoz de Ourense en Común, Martiño Xosé Vázquez, considerou “cando menos sospeitosa” a firma do convenio “catro días antes das eleccións a Cortes”.

“Ten certo matiz de electoralismo”, sinalou Vázquez, quen, con todo, confirmou que a súa formación non vai recorrer ante a xunta electoral de zona porque non se presentan a esta cita electoral, aínda que en caso contrario tamén darían este paso “porque é de manual”.

Para Vázquez, a firma deste acordo reflicte a “nula capacidade de diálogo” do equipo de goberno, “incumprindo sistematicamente acordos plenarios”, en referencia ao rexeitamento mostrado no último Pleno a un acordo para a chegada da Alta Velocidade á cidade.

Criticou que o convenio que se asinará esta tarde é “unha carta aberta para solicitar votos” que “non define absolutamente ningunha” das necesidades de reformulación do urbanismo coa chegada da Alta Velocidade. Neste sentido, lamentou que non aclara como quedará a permeabilidade entre os barrios ou como será a futura estación.

O portavoz de Democracia Ourensá (D.O.), Gonzalo Pérez Jácome, tamén descartou realizar unha denuncia. “Non nos presentamos a estas eleccións, pero a única verdade é que se realiza a catro días das mesmas”, remarcou.

D.O.: NON A UN CONVENIO ‘LOW COST’

Jácome dirixiu as súas críticas contra o alcalde, Jesús Vázquez, ao que cualificou como “un tramposo” e ao que acusou de “vender a Ourense cun convenio ‘low cost’ que a cidade non se merece”.

O portavoz de D.O. coincidiu co resto da oposición ao criticar que a firma do convenio teña lugar no Salón de Plenos do Concello, “onde a maioría de Ourense, a través dos seus representantes, rexeitou un convenio” similar.

Pola súa banda, o alcalde de Ourense, Jesús Vázquez, respondeu aos grupos da oposición que acudan á xunta electoral provincial “se algún estima que non é oportuna” a firma do convenio.

PARA O ALCALDE AS CRITICAS SON “UNHA REPRESENTACIÓN TEATRAL”

Para o alcalde, a protesta en bloque dos grupos da oposición foi “unha representación teatral” de cara ás eleccións que “non ten que ver coa xestión diaria da cidade”.

En resposta ás críticas de “electoralismo” na data da firma do acordo, o alcalde da cidade reivindicou que “a administración debe continuar” independentemente de que haxa eleccións ou non.

Así, incidiu en que “a cidade necesita seguir en marcha” e que non pode “paralizarse” a vida política e a xestión en función a que haxa citas electorais. De feito sinalou que este ano están previstas varias eleccións e que, en caso de ter que deter a vida política, “nunca poderiamos asinar nada”.

“Electoralismo é tratar de paralizar, ou tachar de electoral algo que é un convenio que pasou por Xunta directiva e que todo o mundo coñece”, concluíu.

PLENO EXTRAORDINARIO

As críticas da oposición producíronse minutos despois de rematar un pleno extraordinario convocado polo Concello para o pago de facturas atrasadas a provedores por un importe de 1,4 millóns de euros. A modificación de créditos saíu adiante co apoio dos concelleiros do PP e do PSOE (16), a abstención de Ourense en Común (3) e a oposición de Democracia Ourensá (8).

A concelleira popular Ana Morenza defendeu a necesidade de aprobar a modificación de créditos para que os provedores “poidan cobrar canto antes”. Neste apartado, contou co respaldo do PSOE, cuxo portavoz, Ángel Vázquez, considerou que “os provedores non teñen a culpa” dos “fallos de xestión” do grupo de goberno municipal.

Este respaldo dos socialistas deu pé a un duro enfrontamento entre os portavoces socialista e o de D.O., que se opuxo a esta medida ao considerar que “o alcalde non estaba autorizado a facer estes gastos” e que, para poder realizalos, tería que aprobar os orzamentos ou contar co respaldo previo do pleno.

Tras estas declaracións, Vázquez Barqueiro (PSOE) criticou a Pérez Jácome por “aspirar” a ser alcalde e “non ter nin idea” e acusoulle de “vivir na lúa”, mentres que o portavoz de D.O. respondeu ao socialista que lle vén grande “ser concelleiro” e botoulle en cara a perda de edís nas pasadas municipais.