O PPdeG arrincará en Santiago unha campaña na que participarán Sáenz de Santamaría e Rajoy

O PPdeG arrincará en Santiago na madrugada do xoves ao venres 10 de xuño a campaña para as eleccións xerais do 26J. Serán 15 días “a pé de rúa” nos que os populares galegos contarán coa presenza do candidato e presidente en funcións, Mariano Rajoy; da vicepresidenta, Soraya Sáenz de Santamaría; e coa dos ministros e vicesecretarios da Executiva estatal do partido.

Tamén está previsto que o líder do PPdeG, Alberto Núñez Feijóo, abandone a comunidade para participar en actos en dúas comunidades. Aínda que a súa axenda fóra de Galicia aínda se está pechando, Tellado destacou que a súa prioridade será a comunidade, tendo en conta que “non chegarían os 15 días de campaña” para atender “as peticións” de todos os concellos galegos e de autonomías que queren contar con el.

Tras a reunión do comité de campaña, o secretario xeral do PPdeG, Miguel Tellado, concretou que o acto de pegada de carteis terá lugar na capital galega, mentres que para a xornada de peche, o 24, os populares contemplan que Feijóo estea en actos do catro provincias galegas, con dous grandes mitins.

Tellado, que esta mesma semana avanzara un xiro na campaña, hase refirmado en que os populares prevén “falar menos e escoitar máis”. Entenden que os cidadáns están “cansos” e mesmo “frustrados” pola repetición dos comicios, polo que subliñou que, o primeiro, antes de solicitar o voto, é “pedir desculpas por non ser capaces de garantir un goberno estable” para España.

“O PP sairá á rúa a escoitar aos galegos e tomar nota das súas preocupacións”, remarcou, antes de insistir en que os encontros con cidadáns e actos de proximidade terán o máximo protagonismo nunha campaña na que non haberá máis dun mitin ao día. “Será unha campaña máis participativa, máis próxima”, subliñou.

Os populares “asumen” que lles tocará formar goberno tras a cita do 26J, unhas eleccións que lamentablemente se teñen que repetir pola vontade de bloqueo dos partidos de esquerda e de esquerda radical, polos que perderon as eleccións e imposibilitaron que o partido que gañou puidese gobernar”.

“UN PRESIDENTE GALEGO”

Así as cousas, os populares protagonizarán “unha campaña coral”, que acabarán de perfilar nos próximos días, e que será “intensa” para tentar convencer aos cidadáns de que para Galicia “o fundamental non é ter grupo propio, senón un presidente galego, que só pode ser un: Mariano Rajoy”.

“Un presidente galego que mire por Galicia”, apostilou, antes de incidir en que esta campaña será distinta da do 20D tamén porque os populares buscan “ampliar a súa base electoral” e non tanto a mobilización dos seus, que xa o están”. “Cambiaremos as sedes dos hoteis polas rúas e prazas de toda Galicia”, reivindicou.

Como xa manifestara esta semana, os populares incidirán na “coherencia política” do PP, que contrapuxo coa “irresponsabilidade” do resto de partidos. Así, volveu a insistir en que o PSOE “non foi capaz de construír unha alternativa”, pero si de impedir “calquera opción de que gobernase o máis votado”.

“Ao seu lado”, apuntou que “estivo Podemos, moi interesado en tocar poder, pero non para mellorar a vida dos cidadáns, senón para controlar o CNI, o Exército ou TVE e outras cuestións que nada teñen que ver co 15M”. En canto a Cidadáns, subliñou que, “tras apelar ao voto do centro e do centro dereita”, tratou de articular “un goberno de esquerdas”.