O Igape informa en Vigo sobre as ferramentas para apoiar os investimentos empresariais

O director do Igape, Javier Aguilera, informou hoxe en Vigo sobre os instrumentos habilitados pola Xunta para apoiar os investimentos empresariais, dentro das VII xornadas técnicas organizadas pola Asociación Española de Contabilidade e Administración de Empresas (AECA).

Durante a súa intervención, o director do Igape destacou que, no marco do programa Galicia 1000, as empresas galegas poden acceder a unha serie de instrumentos para o seu funcionamento operativo ou para o desenvolvemento de investimentos. Neste sentido, Aguilera referiuse ao capital risco, aos préstamos participativos ou directos e aos préstamos avalados ou bonificados para facilitar o acceso a financiamento de circulante.

O Instituto mantén tamén activado o programa Galicia Inviste, con liñas de apoio para investimentos comprendidos entre 50.000 e 900.000 euros, tanto para novos equipamentos produtivos como para proxectos centrados na creación de postos de traballo. A finalidade de todos estes programas, segundo salientou, é procurar que as pemes galegas conten sempre cos apoios adecuados as súas necesidades concretas de financiamento.

O director do Igape recordou igualmente a variedade de instrumentos de capital risco dos que dispón Xesgalicia para apoiar os investimentos empresariais na comunidade autónoma, sexa cal sexa a fase de desenvolvemento dos proxectos: posta en marcha e primeiro crecemento, co Fondo Galicia Iniciativas Emprendedoras; consolidación e crecemento, mediante os Fondos Xes Innova e I2C; ou desenvolvemento ou diversificación, co apoio de Sodiga ou o Fondo Emprende.

A través destes instrumentos que conforman os programas Galicia 1000 e Galicia Inviste, Aguilera salientou que a Consellería de Economía, Emprego e Industria está preparada para que ningún proxecto empresarial viable quede sen desenvolver por falta de instrumentos de apoio que se adecúen ás súas necesidades de financiamento.