O IES Puga Ramón conmemoración o seu 50 aniversario

O presidente da Deputación da Coruña, Valentín González Formoso, participou nos actos conmemorativos do 50 aniversario do IES Puga Ramón e animou ao alumnado a aproveitar estes anos de formación e compañeirismo.

Naceu como centro asistencial para as nenas da Milagrosa en agosto de 1966 e este ano cumpre 50 anos de actividade educativa ininterrompida. O IES Puga Ramón está de aniversario e o presidente da Deputación da Coruña, de quen depende, Valentín González Formoso, participou nos actos de celebración nun encontro co alumnado e o profesorado do centro.

González Formoso inaugurou a exposición fotográfica que fai un percorrido polos cincuenta anos de historia do Puga Ramón, desde os inicios como centro de formación asistencial para as nenas da Milagrosa para, a partir da Transición, abrirse ao barrio no que se atopa e, xa nos anos oitenta, converterse nun instituto mixto. Na actualidade, o IES Puga Ramón conta con 420 alumnos e alumnas matriculados.

Imaxes de actividades culturais e formativas, proxectos científicos, intercambios con Francia, exposicións conmemorativas de distintos acontecementos ademais dos actos de recollida de premios do alumnado compoñen esta mostra que se poderá ver nas instalacións do propio centro.
Ademais de visitar a exposición, o presidente da Deputación, Valentín González Formoso xunto coa actual directora, Fernanda Sández, dirixíronlle unhas palabras ao alumnado animando a aproveitar estes anos de formación tan interesantes para o seu futuro. González Formoso defendeu a necesidade dun ensino público e de calidade como clave para un futuro máis xusto e igualitario.

O acto rematou cunha sesión fotográfica no patio e entrada do centro na que o propio González Formoso luciu a camiseta conmemorativa do cincuenta aniversario do centro.