O concurso de acredores dos empresarios da construción de Pontevedra tramitarase por procedemento abreviado

O concurso de acredores da Asociación Provincial de Empresarios da Construción de Pontevedra, declarado polo Xulgado do Mercantil número 3 desa cidade con carácter voluntario, será tramitado polas normas do procedemento abreviado.

Así o recolle o auto, con data do 20 de xuño, no que o xuíz Sergio Burguillo declara en concurso a esta patronal, “toda vez que foi acreditado o seu estado de insolvencia actual”.

O debedor non solicitou a liquidación do seu patrimonio e o maxistrado, pola súa banda, nomea administrador concursal e sinala que o inventario de bens deberá presentarse no prazo de 15 días.

Así mesmo, o auto fai un chamamento aos acredores para que poñan en coñecemento da administración concursal no prazo dun mes a existencia dos seus créditos.

A administración concursal queda autorizada, sen necesidade de ningún outro trámite, para o exercicio de calquera acción en interese da masa activa do concurso. Contra esta declaración cabe impugnación mediante recurso de reposición, no prazo de cinco días.