Nava Castro recibe en Santiago a once empresas mexicanas do mundo audiovisual

Nava Castro coa misión comercial mexicana

A directora de Turismo de Galicia, Nava Castro, recibiu representantes de once empresas mexicanas do mundo audiovisual que visitaron Santiago de Compostela no marco dunha misión comercial México-Galicia promovida polo Clúster Audiovisual Galego (Clag).

As empresas participantes, catro distribuidoras -Corazón Films, Spectrum Films, Latam Pictures e Amarok Films-, cinco produtoras de televisión -Canal Once, Canal 44, TV Azteca, Televisa e TV Grupo Milenio- e dúas empresas de servizos audiovisuais – ON-Mediagroup e AVCS- visitan a nosa comunidade co obxectivo de coñecer de primeira man as posibilidades do sector audiovisual galego e descubrir posibles localizacións para futuros proxectos.

Así, durante a súa estadía en Galicia profundarán en aspectos como as coproducións de distintos formatos, a venda de dereitos e outros asuntos relacionados co sector audiovisual e analizarán diversos territorios galegos para estudar a posibilidade de que se convertan no escenario das súas próximas pezas audiovisuais.

Os participantes desta misión comercial chegaron á nosa Comunidade onte, 13 de xuño, e permanecerán nela ata o próximo venres 17 de xuño.