Mariano Rajoy visitará este xoves as cidades de Santiago e Pontevedra

O presidente do Goberno en funcións e candidato do PP, Mariano Rajoy, participará o xoves nun acto -aínda sen determinar, en función das condicións meteorolóxicas- en Santiago de Compostela e nun mitin en Pontevedra, no marco dunha campaña electoral na que os populares galegos reforzaron a chamada ao “voto útil”.

En rolda de prensa, o secretario xeral do PPdeG, Miguel Tellado, avanzou a presenza de Rajoy en dous das cidades que máis significado teñen para o líder popular, posto que a capital galega é a urbe na que naceu e Pontevedra, na que máis anos residiu. Visitará Galicia nunha semana na que tamén acudirán á comunidade a secretaria xeral do PP, María Dolores de Cospedal, e a vicepresidenta do Goberno, Soraya Sáenz de Santamaría.

En concreto, Cospedal acompañará o xefe de filas do PPdeG, Alberto Núñez Feijóo, que este luns fai campaña fóra da comunidade, durante unha parte da xornada do sábado, e o vicepresidente do Goberno fará o mesmo o domingo.

Á marxe de avanzar os actos máis destacados desta semana, Tellado realizou un balance dos primeiros días dunha campaña marcada por un xiro dos populares cara a actos de maior proximidade en detrimento dos mitins tradicionais. Unha “campaña a pé de rúa” que, chanceou, non solo serve a Feijóo “para comprar calcetíns a bo prezo”, senón tamén para escoitar as demandas cidadás.

Os populares teñen “boas sensacións” en relación a esta campaña e Tellado destacou o “compromiso” con Galicia que demostran as visitas de dirixentes nacionais, fronte aos que “non” acoden a Galicia por non o considerar “prioritario” (o único candidato das principais formacións que non ten previsto acudir á Comunidade é o líder de Podemos, Pablo Iglesias).

“TIRAR O VOTO Á PAPELEIRA”

Por último, concluíu a súa intervención cunha chamada a “concentrar o voto útil” no PPdeG, xa que “pensando en España é necesario votar dende a responsabilidade”. Así, descartou “a utilidade” de votar a un Pedro Sánchez (PSOE) que aínda non aclarou -instoulle a facelo no debate deste luns- se vai permitir que goberne o populismo” e non “quen gañe as eleccións”.

En canto ao apoio a Ciudadanos (C’s) subliñou que meter a papeleta da formación laranxa nas urnas non é solo “tirar o voto á papeleira”, sobre todo “nas provincias de Lugo, Ourense e Pontevedra”, senón reforzar as posibilidades de que o devandito voto “remate en Podemos e amplíe as súas opcións de mellorar en escanos.