García-Borregón asegura que o informe ambiental sobre o dragado da ría de Ferrol se fixo no momento que correspondía

O que foi director xeral de Conservación da Natureza da Xunta no ano 2011, Ricardo García-Borregón Millán, asegurou este luns que o informe ambiental relativo ao dragado da ría de Ferrol foi “feito na data que corresponde” e “non a posteriori”.

Díxoo ante os xornalistas este exalto cargo da Xunta, tras comparecer ante o xulgado de instrución número tres de Santiago, que o investiga -xunto con outros tres exdirixentes autonómicos- polos supostos delitos de falsidade documental, prevaricación e contra os recursos naturais e o medio.

En concreto, indaga se autorizou o dragado da canle da ría de Ferrol co obxectivo de facilitar a entrada e saída de buques gaseros cara á planta de Reganosa cun informe realizado posteriormente para rebater outro previo que alertaba sobre os danos ambientais que provocaría esta intervención nunha área protexida.

Ao respecto, García-Borregón mantivo que ese informe se fixo “dentro do procedemento ambiental” e “conforme á tramitación”, é dicir, no momento regulamentario. Polo tanto, negou que exista “absolutamente nada en relación a iso” de que se redactou pasado o tempo.

De feito, recalcou que o documento que alerta sobre os danos ao medio non dependía do seu departamento, senón “dos “propios técnicos e funcionarios do tema”. “E aclarouse ese informe primitivo cun informe definitivo”, respondeu así para rebater a denuncia de ocultación do primeiro texto.

“DICIR A VERDADE”

Dito isto, o tamén exconcelleiro do PP en Santiago aseverou que “sen lugar a dúbidas” se cumpriron todos os protocolos para levar a cabo o dragado da ría ferrolana. “Ten a declaración de impacto ambiental por parte do ministerio”, reafirmouse.

Polo tanto, tras indicar que respondeu a todas as preguntas do seu avogado e da Fiscalía, xa que a acusación particular, que exerce a asociación ecoloxista Adega, non interveu, García-Borregón subliñou que a súa declaración consistiu en “dicir a verdade” para “deixar claro” como foi o procedemento.

VISIÓN DE ADEGA

Fronte a iso, o secretario xeral de Adega, Fins Eirexas, considerou “irrebatible” que o informe polo que se autorizou o dragado foi realizado “anos despois” co fin de xustificar aquela actuación.

Ese documento, “cociñado á medida” para ocultar que se obviara o que advertía dos danos que se causarían, como resaltou, é a base da imputación do delito de falsidade documental. A partir de aí como recalcou o ecoloxista vén o de prevaricación, pois “se tomou unha decisión fraudulenta a sabendas” e sen importar que derivase en dano ambiental.