Drones e efectivos de emerxencias retoman a busca do músico desaparecido no Miño

Os drones da Axencia Galega de Emerxencias (Axega) incorporaranse novamente este xoves ao operativo de busca do músico galego desaparecido na noite do sábado no río Miño tras actuar nas festas de Lapela (Monçao), en Portugal.

Segundo informaron dende o 112-Galicia, o operativo continuouse por quinto día a primeira hora deste xoves, coa participación de efectivos de Protección Civil, que buscan o desaparecido polas marxes do río tanto no lado galego coma no portugués en coordinación cos servizos de emerxencias deste país.

Así mesmo, tamén os avións non tripulados da Axega volverán rastrexar a zona, tal e como xa fixeron o luns, aínda que sen resultados.

Na xornada do domingo, efectivos do operativo atoparon a boquilla do trombón de varas do desaparecido, e, posteriormente, as chaves do seu coche e o propio instrumento. Ao longo destas xornadas interviñeron tamén mergulladores.