Dous turismos calcinados dentro dun garaxe en Ferrol

Un incendio iniciado na madrugada deste xoves nun cadro eléctrico dun garaxe en Ferrol calcinou por completo dous vehículos que se atopaban no seu interior, aínda que sen causar danos persoais.

Segundo a información do CAE-112 Galicia, as lapas comezaron en torno ás 3,30 horas nun garaxe da rúa Españoleto, en Ferrol. Como consecuencia do lume resultaron totalmente calcinados dous coches, aínda que tamén se produciron danos noutros vehículos e chegaron a caer cascotes do teito.

Ata o lugar desprazáronse efectivos dos Bombeiros de Ferrol e da Policía Local que, non obstante, descartaron desaloxar aos inquilinos do edificio.