Dous ciclistas testemuñas do atropelo da Guarda ratifican que o turismo os arrastrou

Dous dos ciclistas que resultaron feridos o pasado 12 de marzo, despois de que un condutor atropelase o pelotón no que circulaban na Guarda (causando a morte a un deles e feridas a outros sete), ratificaron este martes no xulgado a súa versión do sinistro: o coche arrastroulles “sen frear, nin pitar, nin desviar a traxectoria”.

Así o manifestou un destas testemuñas, Carlos Prado, que compareceu no xulgado de instrución número un de Vigo para explicar o que viu ese día. “Eu non o chamo accidente, foi un atropelo. Un coche que viña por detrás, e arrastrou ao grupo, sen pitar, sen frear, sen desviar a traxectoria”, incidiu, en declaracións aos medios.

Segundo relatou, el circulaba na parte dianteira do grupo e cando o coche se lles botou “enriba” e viu os seus compañeiros creu que estaban “todos mortos”. Tamén confirmou que se decatou de que o condutor parara o coche varios metros máis adiante e, aínda que creu que sairía do vehículo e se achegaría a eles, “ao pouco rato foise”.

“Gustaríame pensar que quedou inconsciente, que pedise perdón, que dixese que lle deu un mareo, ou que lle caeu o teléfono, pero non tantas mentiras, non dicir que o grupo se meteu no medio”, lamentou.

VELOCIDADE

“Dixo que ía a 50 quilómetros por hora, cando o atestado da Garda Civil di 90. A 50 por hora non se fai o estrago que había alí, iso só pódese facer a unha velocidade moi alta”, denunciou. “Os que estivemos alí sabemos o que pasou. Vímolo todos”, engadiu.

Carlos Prado sinalou que é “evidente” que a versión do condutor, de que os ciclistas se cruzaron na súa traxectoria, non é compatible co atestado e co feito de que “non freou”. A ese respecto, puntualizou que o pelotón era un “grupo longo” e que, se o condutor fose á velocidade axeitada, “lle daría tempo a reaccionar e salvar a algún”.

Esta testemuña lamentou que “os ciclistas sempre son os culpables”, e sinalou que, aínda que cometan erros, “son insultados” por moitos condutores que “nin sequera saben que poden pisar a liña continua” para adiantar un ciclista.

Por último, Carlos Prado sinalou que todos os ciclistas implicados no sinistro están “moi afectados”, pero indicou que “ver saír á xente adiante dá moita moral”. De feito, confirmou que el mesmo volveu practicar este deporte “pouco a pouco” e que, cada logro de cada un deles é unha “celebración”.

O atropelo produciuse o 12 de marzo pasado, na estrada que une pola costa Baiona e A Guarda; no sinistro faleceu un dos ciclistas, e outros sete quedaron feridos (varios moi graves). O xulgado decidiu, poucos días despois, retirar o carné ao condutor do coche, un home de 86 anos de idade.

Os xulgados de Vigo acollerán nos próximos días novas declaracións de testemuñas por exhorto (ao igual que foron as deste martes). Así, está previsto que o próximo 4 de xullo compareza outro ciclista, Manuel B.F., ante o xulgado de instrución número seis, e ese mesmo día haberá outra comparecencia nos xulgados de Burgos (do condutor doutro coche que ía detrás do vehículo implicado); e o 6 de xullo comparecerán dúas testemuñas máis no xulgado de instrución número cinco de Vigo.