Condenado a sete anos e medio de prisión por intentar matar á parella da súa exmuller

A Sección Primeira da Audiencia Provincial da Coruña condenou a sete anos e medio de prisión a un home, Juan Manuel F.V., que tratou de acabar coa vida da parella da súa exmuller, segundo considera probado o fallo, feito público polo Tribunal Superior de Xustiza de Galicia (TSXG).

A sala considérao culpable dun delito de violación de morada en concurso cun delito de homicidio en grao de tentativa, coa concorrencia da circunstancia atenuante analóxica de anomalía psíquica polo trastorno mixto ansioso-depresivo que padecía.

A sentenza considera probado que o acusado entrou na vivenda por unha ventá que estaba aberta e esperou ata que o prexudicado saíu do baño para golpealo cun machado na cabeza.

En concreto, sinala que, sobre as 12,00 horas do 27 de marzo de 2015, o home, de 50 anos, xa condenado por violencia doméstica e de xénero, acudiu á parroquia de Doroña, no termo de Vilarmaior (A Coruña), onde convivían a que fora a súa muller e a súa actual parella.

O auto indica que, “con intención de matar” ao home, o condenado levou no seu automóbil un machado, que portaba consigo cando entrou por unha ventá da casa que estaba aberta.

GOLPES CUN MACHADO

Unha vez dentro, esperou a que o home saíse do cuarto de baño para golpearlle repetidas veces co machado na zona esquerda da cabeza, nos brazos e as perna, podendo forcexar con el ata que caeu ao chan.

O procesado pisoulle tamén o colo para cortarlle a respiración, pero, aínda así, a vítima logrou empurralo e saír ao exterior da casa pedindo auxilio.