Beatriz Mato convida aos máis pequenos a colaborar no coidado do medio ambiente
A conselleira de Medio Ambiente e Ordenación do Territorio, Beatriz Mato, animou hoxe aos máis pequenos a colaborar no coidado do medio ambiente para conseguir construír, entre todos, un planeta “sustentable”.
Así o sinalou hoxe durante a súa participación na clausura do programa EcoVoz 2016, que tivo lugar en Cerceda, e no que se entregaron os premios aos centros educativos que participaron nesta actividade de carácter ambiental e educativo.
A titular do departamento autonómico recordou que hai xestos “moi sinxelos” que poden aportar “moito” na preservación do medio ambiente. Entre outros, citou exemplos como a separación de residuos para mellorar a reciclaxe, ou o aforro da enerxía e da auga nas nosas actividades cotiás.
Ademais da iniciativa clausurada hoxe, a Consellería de Medio Ambiente e Ordenación do Territorio impulsa e colabora tamén noutras actuacións que teñen como obxectivo promover a conciencia ecolóxica entre os nenos e nenas. Así, en colaboración coa Consellería de Educación, puxéronse en marcha oito programas de carácter medio ambiental dentro do Plan Proxecta; e implantouse, este curso, a materia “Paisaxe e sustentabilidade” como materia de libre elección en secundaria e bacharelato.