Atopan a unha muller falecida e ao seu marido inconsciente nunha vivenda en Ourense

Efectivos sanitarios de urxencia localizaron este luns unha muller de 84 anos falecida e o seu marido inconsciente na súa vivenda da cidade de Ourense. Segundo a información da Central de Atención a Emerxencias 112-Galicia, foi unha neta a que, ante a falta de noticias da parella, se desprazou ata o domicilio, situado na rúa Gregorio Fernández, sobre as 12,00 horas. Dentro do piso atopou a parella inconsciente e pediu asistencia sanitaria.

A ambulancia do 061 desprazada ata o lugar confirmou o falecemento da muller e trasladou o home, inconsciente, ao Hospital Clínico de Ourense. Dado que na vivenda se apreciaba un olor “moi forte”, os Bombeiros de Ourense realizaron medicións que deron resultado negativo, polo que se descarta un escape de gas.

A Policía Nacional investiga agora como se orixinaron os feitos, dado que, segundo confirmaron efectivos de emerxencias, as vítimas non presentaban signos de violencia aparentes.