As asociacións críticas coa CEP interpoñen un recurso contra a sentenza que ratifica a validez das eleccións

As asociacións críticas coa actual dirección da Confederación de Empresarios de Pontevedra (CEP) interpuxeron este mércores un recurso de apelación ante a Audiencia Provincial de Pontevedra contra a sentenza do Xulgado de Primeira Instancia número 1 de Vigo que, aínda que estimaba parcialmente a súa demanda, confirmaba a validez do proceso electoral do organismo.

Nun comunicado, asinado polas asociacións Aceca, AJE Vigo, Aipclop, Asime, a Asociación de Industria Química, Asetranspo, Atra e Instalectra, os críticos afirman que presentaron este recurso “en defensa do interese xeral dos empresarios de Pontevedra”.

Así as cousas, entenden que “a cualificación xurídica dos feitos probados na sentenza é contraria a principios fundamentais”, especialmente unha vez que se considera “probada a falsidade de numerosas sinaturas de diversos vogais”.

“O Noso ordenamento xurídico non pode convalidar de ningunha forma os votos emitidos en nome de quen non consentiu a delegación”, subliñaron os críticos, que compararon esta situación con “validar a retirada de fondos do banco por un non titular dunha conta”. “É inaceptable nun estado de dereito”, concluíron.

RESOLUCIÓN XUDICIAL

O xulgado de primeira instancia número 1 de Vigo ditou a mediados de maio unha sentenza admitindo parcialmente a demanda interposta por este grupo de asociacións críticas e, aínda que confirmou a validez do proceso electoral, ordenou repetir a elección para a Vicepresidencia de Territoriais da organización porque alega que solo se pode falar dun único voto inválido.

Trátase dun voto dobre, o dunha persoa que o delegara e que tamén votou de forma persoal. Esta irregularidade afectou á designación da Vicepresidencia de Territoriais, á que optaban Rubén Hermida (AJE Vigo) e José Manuel Valenzuela (AJE Pontevedra). En aquel momento produciuse un empate de votos e designouse a Valenzuela, por ser o candidato de maior idade.