A CIG reitera que o naval vigués está abocado a desaparecer sen apoio institucional

A Federación de Industria da CIG insistiu en que o sector naval da Ría de Vigo está abocado á súa desaparición se as administracións “non se implican, avalan e dan solucións ao problema” da falta de carga de traballo, e en concreto acusou ao Partido Popular de que “a súa idea é deixar morrer e desaparecer” o sector se con xestión privada non é capaz de reflotar.

Así o trasladaron nunha rolda de prensa este luns o secretario nacional de CIG-Industria, Xoan Xosé Bouzas; o responsable nacional do naval, Emilio Cagiao, e o responsable do naval na bisbarra, César Rodríguez, acompañados por representantes de estaleiros da Ría de Vigo, tras reunirse en abril cos grupos do Parlamento galego en relación a este tema.

Tal e como manifestaron, todos os grupos políticos trasladaron o seu apoio ás formulacións do sindicato, coa salvidade do Partido Popular, que, aseguraron, mostrou a súa “discrepancia” con estas denuncias e manifestou que “baixo ningún concepto” aposta por que as institucións públicas entren nos consellos de administración.

Ademais, os voceiros, que censuraron que o Goberno autonómico e a Asociación Cluster Naval Galego (Aclunaga) non lles recibiron, engadiron que a postura do PP é que “se a xestión privada non dá os seus froitos, aínda que sexa sector estratéxico, a súa idea é deixalo caer, deixalo morrer e desaparecer”.

Neste marco, responsabilizaron da situación á Xunta e aclararon que o que piden non é que dirixa o naval, senón que, “se é un sector estratéxico, entre nel e entre en consellos de administración -dos estaleiros- para ser corresponsable” e “dar unha garantía de cara á contratación de obras”. Ademais, reclamaron que poña en marcha “unha política industrial” e de financiamento.

“Se non hai unha aposta decidida da administración pública, tanto autonómica como estatal, este é un sector que vai desaparecer”, advertiu Bouzas, antes de facer un chamamento tamén ao Goberno vigués porque o alcalde, Abel Caballero, “se vangloría do sector cando é un sector que está a desaparecer e que arrastra” a outros sectores.

CAMPAÑA

Por todos estes motivos, a CIG comunicou que vai iniciar unha campaña divulgativa, pola que colocará carteis e percorrerá os comercios e empresas da bisbarra viguesa para transmitir a situación de emprego no sector e alertar de que “unha vez entrados no verán, o naval na Ría de Vigo vai ter menos de 1.000 traballadores activos”.

Os voceiros trasladaron, facendo referencia a datos do Ministerio de Industria, que entre os anos 2000 e 2016 se perderon 5.882 postos de traballo na Ría de Vigo, e por cada posto directo perdéronse tres indirectos, é dicir, outros 17.646 empregos. “O naval non só non repunta, senón que está nun impasse no que pode caer algún estaleiro”, aventuraron.

Neste contexto, Bouzas considerou “sorprendente” que o conselleiro de Industria, Francisco Conde, durante a feira de Navalia -celebrada a finais de maio en Vigo- tivese “a desfachatez de vir dicindo que non pasa nada e que hai carga de traballo, cando a situación é penosa” nos estaleiros vigueses. “Non hai construción nova, o sector só subsiste”, mantivo.

A iso, Cagiao engadiu que non le “estrañaría” que no tempo que queda ata as eleccións autonómicas “saian fragullas” para algún dos estaleiros, se ben mantivo que “iso non sería unha solución” para o sector, que necesita “que a administración se implique, avale e dea unha solución”.

En relación a iso, criticou que as institucións “si se preocuparon por reclamar” indemnizacións á Comisión Europea tras a sentenza do Tribunal de Luxemburgo que anulaba a decisión do Executivo comunitario de declarar ilegal o sistema español de bonificacións, coñecido como tax lease, en lugar de pedir carga de traballo.

“O sector naval xa chega cinco anos de parálise e por moita propaganda que se faga aproveitando certos eventos, ao final os datos son a realidade”, recalcou Rodríguez, que reprobou que “non se crearon as ferramentas necesarias para que o sector tan tocado polo tax lease puidese rexurdir de novo”.

ESTALEIROS

En canto á situación dos estaleiros da Ría de Vigo, Bouzas sinalou que Barreras e Vulcano se atopan na actual situación “pola mala xestión dos propios empresarios, coa complicidade da Xunta, porque –houbo– grandes anuncios pero en papel non hai absolutamente nada concretado”.

Así as cousas, sobre Barreiras, referendaron que Pemex “está a buscar compradores para os floteles” e “quere desfacerse” da súa participación no estaleiro vigués, ante o que os sindicalistas abriron a posibilidade de que “se non hai carga de traballo” os traballadores poderían ter que ir en verán “a un ERE por seccións”.

“Non é cuestión de ser catastrofista, pero –en Barreras– a día de hoxe non hai contrato nin posta en vigor, co cal no momento en que o flotel se entregue o estaleiro queda baleiro,”, explicaron, antes de engadir que ademais “aínda que houbese un anuncio en firme nos próximos meses, a situación é que o estaleiro está paralizada e tería que volver reactivarse”.