Tahoces destaca a importancia do parque empresarial do Corgo na competitividade do tecido empresarial local

Ángel Bernardo Tahoces na visita ao parque empresarial

O director xeral de Enerxía e Minas, Ángel Bernardo Tahoces, visitou hoxe as instalacións do parque empresarial do Corgo, onde subliñou a importancia destas infraestruturas no desenvolvemento económico e social dos concellos galegos. Neste sentido, Bernardo Tahoces resaltou o papel que xoga este polígono no impulso da actividade económica da localidade e da competitividade das súas empresas.

Durante a visita, o director xeral resaltou a mellora das infraestruturas que está a levar a cabo o Concello no parque empresarial, desenvolvendo actuacións que lle permiten ofrecer un mellor servizo ás empresas alí instaladas. Así, o ano pasado, cun apoio da Consellería de Economía, Emprego e Industria de preto de 100.000 euros, o Concello do Corgo desenvolveu un proxecto centrado na mellora dos accesos ao polígono desde a N-VI.

Este ano a Consellería convocou unha nova orde apoios para colaborar cos municipios galegos na mellora competitiva dos polígonos industriais, dada a súa importancia no desenvolvemento económico das vilas de cara a impulsar o crecemento e a xeración de emprego.

O programa, pendente de resolución, prevé, un ano máis, apoios de ata o 80% do custo subvencionable, cun máximo de 120.000 euros por solicitude. Así mesmo, permítese o pago de anticipos de ata o 25% da axuda concedida.

A través desta liña promoveranse diferentes accións que abarcan a dotación de servizos centralizados de xeración e subministración de enerxía de cara ao aforro e a eficiencia no gasto enerxético, novas plantas de depuración de augas, xestión de residuos, vías de acceso aos parques empresariais, ou instalacións de sistemas de seguridade e vixilancia, entre outros.