Pasan a disposición xudicial os detidos na operación antidroga en Barbanza e Arousa

Os detidos nunha operación contra unha trama de distribución de droga en Vilagarcía, A Pobra e Rianxo comezaron a pasar a disposición xudicial na mañá deste venres. Segundo informaron fontes xudiciais, os detidos comezaron a comparecer ao mediodía ante o maxistrado do Xulgado de Instrución número 1 de Ribeira, que investiga os feitos.

O operativo, desenvolvido pola Garda Civil e da Coruña e denominado ‘Tincan’, é o resultado das investigacións que se realizaban hai máis de seis meses para desarticular unha trama que se dedicaba á venda de droga na zona de Arousa e O Barbanza. En total hai oito detidos, dous dos cales foron apresados a última hora do xoves.

Esta investigación comezou despois de que se detectase a existencia dun importante punto de distribución de substancias estupefacientes que subministraba droga de xeito continuado a numerosos toxicómanos e traficantes de menor entidade da Bisbarra do Barbanza e outras localidades limítrofes.

No transcurso destas dilixencias, os axentes do Equipo de Delincuencia organizada e antidroga (EDOA) do Instituto Armado incautáronse dun quilogramo de cocaína, medio de heroína, hachix, 100 plantas de cannabis, instrumentos habitualmente empregados para a adulteración, prensado e distribución da droga, máis de 60.000 euros en efectivo a varios vehículos propiedade dos arrestados.