O servizo Europe Direct celebra o seu vixésimo aniversario

A Deputación da Coruña celebra hoxe, coincidindo co Día de Europa, o vixésimo aniversario da creación do servizo Europe Direct A Coruña, un dos primeiros centros oficiais de información da Comisión Europea que se implantaron en España.

O 9 de maio de 1996, ás 12.30 horas, abría as súas portas no Pazo provincial coruñés este centro de información, cuxo obxectivo fundamental é achegar Europa aos cidadáns e aos axentes locais, ofrecendo información sobre as diferentes actividades e convocatorias da Unión Europea.

O presidente da Deputación, Valentín González Formoso, felicitou hoxe aos traballadores do centro, destacou o “carácter pioneiro” da Deputación en achegar a información europea aos cidadáns coruñeses e gabou a “excelente labor” desenvolvida durante estas dúas décadas.

Baixo o lema “20 anos comunicando Europa”, Europe Direct programa hoxe diversas actividades. Durante a mañá, numerosos traballadores da Deputación posaron ante un photocall instalado no hall de entrada do pazo provincial, no que trasladaron as súas mensaxes de felicitación a través das redes sociais.

Debate sobre os 30 anos de España na UE

Pola tarde, o Sporting Club Casino da Coruña acollerá o debate “Europa e Portugal: perspectivas tras 30 anos de adhesión á Unión Europea”, coa participación do catedrático de Economía da USC, Julio Sequeiros, o xornalista e profesor de Dereito da UDC, Fernando Salgado, e o presidente do Conselho de Administraçao de Quaternaire (Portugal), Antonio Figueiredo.

Pola noite, a sede da Deputación da Coruña volverá a iluminarse de azul para celebrar este Día de Europa, no que se cumpren 66 anos da histórica “Declaración Schuman”, considerada o xerme da actual Unión Europea.