O goberno vigués ve intencionalidade política do 112 para que os bombeiros non acudisen a Fandicosta

O goberno municipal de Vigo denunciou este luns que houbo “intencionalidade política” na actuación do 112 cando se produciu o incendio da fábrica de Fandicosta, para que os bombeiros da cidade non acudisen ao sinistro.

Así manifestouno no pleno municipal o voceiro socialista, Carlos López Font, quen se remitiu ao parte do oficial xefe do servizo sobre o acontecido esa tarde, e asegurou que o 112 rexeitou a intervención dos Bombeiros de Vigo nese incendio.

Segundo proclamou, o Concello olívico ten “vocación de colaboración”, que demostrou acudindo “a todos os sitios” onde foi requirido.

Pola súa banda, o concelleiro do PP Miguel Fidalgo lamentou a “política carroñera” do goberno municipal por “buscar réditos electores dun accidente”, e subliñou que a xestión do sinistro por parte do 112 foi “impecable”.

Así mesmo, sinalou que o servizo de emerxencias non impediu aos bombeiros acudir e recordou que xa está a cambiar o protocolo e “se vai chamar aos Bombeiros de Vigo” para que acudan ás intervencións na bisbarra.

Finalmente, o concelleiro de Marea Xosé Lois Jácome precisou que o problema de descoordinación nas intervencións non teñen solo relación co protocolo de actuación, polo que a revisión deste sistema “é insuficiente”. Segundo aseverou, a orixe da “nefasta xestión” é que os parques comarcais están “subcontratar” e deben volver á xestión pública.