O CHUO agradece a rápida resposta das forzas de seguridade tras a liorta

O Complexo Hospitalario Universitario de Ourense (CHUO) reforzou a súa seguridade despois do tiroteo sufrido na noite deste domingo na entrada principal con motivo dun enfrontamento armado entre dúas familias xitanas residentes en Maside (Ourense).

Así sinalouno este luns o director de Procesos Asistenciais, Miguel González, durante unha rolda de prensa na que leu un comunicado no que a dirección do complexo agradeceu a “rápida” actuación do seu persoal e dos corpos e forzas de seguridade.

González confirmou que “en prevención” de novos incidentes a dirección da Xerencia de Xestión Integrada de Ourense del Servizo Galego de Saúde (Sergas) puxo en marcha un reforzo do seu complexo de seguridade en colaboración coas forzas de Seguridade.

Segundo indicou, trátase dun operativo de prevención no que traballan de forma coordinada membros da seguridade privada do centro e os membros dos corpos de seguridade do Estado, que se puxo en marcha para este caso en concreto.

CONTACTO CON AUTORIDADES POLICIAIS E XUDICIAIS

Por outra banda, o director de Procesos Asistenciais sinalou que o CHUO tamén mantén o contacto coas autoridades policiais e xudiciais “para achegarlles toda a información que precisen para esclarecer os feitos”.

Miguel González agradeceu de parte do CHUO a “rápida resposta dos corpos e forzas de seguridade”, así como a “actuación” do seu persoal sanitario e de seguridade, que “evitaron unha maior gravidade dos acontecementos”.

González destacou que na hora á que tivo lugar o suceso, sobre as 23,30 horas do domingo, non había moita circulación de público ou de persoal, a pesar de que os feitos tiveron lugar na entrada principal do recinto hospitalario.

IMPACTOS DE BALA

As portas de entrada do CHUO reflicten este luns o enfrontamento armado entre os homes que se atopaban no seu interior e os que dispararon dende o exterior, que deixaron numerosos impactos de bala nas portas exteriores e interiores do recinto.

Este luns pódense observar buratos nos caneiros de auga e o revestimento de pedra exterior, pero tamén as pegadas de dous disparos nos portelos do servizo de información que está dentro do CHUO.

“Tan só se rexistraron dous feridos, que foron atendidos polo Servizo de Urxencias e dados de alta ás poucas horas”, confirmou González.

Por parte da dirección do CHUO sinalouse que, a pesar dos momentos de tensión vividos o domingo, “tanto no servizo de Urxencias coma no resto”, a asistencia sanitaria desenvolveuse con normalidade “en todo momento”.

O texto lido polo director de Procesos Asistenciais concluíu sinalando que o uso de armas “é sempre rexeitable”, e, sobre todo, cando se produce nun ámbito sanitario “inviolable segundo todas a convencións internacionais”.

“Non hai nada que xustifique o uso de armas poñendo en risco a vida das persoas que acoden (ao centro sanitario) para recibir asistencia, concluíu González.

FEITOS

O tiroteo tivo lugar sobre as 23,30 horas deste domingo no hall de entrada principal do hospital. Na liorta víronse implicadas unhas sete persoas, todas elas de etnia xitana. Os servizos de emerxencias apuntan a unha disputa familiar como orixe do tiroteo, que se produciu tras un enfrontamento.

Este luns foron detidos dous irmáns dun clan xitano debido á liorta, mentres que a Policía Nacional busca o pai de ambos os dous para arrestalo tamén. Así o confirmaron fontes policiais, que explicaron que os dous irmáns detidos foron trasladados á Comisaría Provincial de Ourense, onde permanecen á espera de pasar a disposición xudicial nas próximas horas.