Noriega considera respectable que Feijóo non adiante as eleccións

O alcalde de Santiago, Martiño Noriega, cualificou de “decisión respectable” que o presidente galego, Alberto Núñez Feijóo, decida non adiantar as eleccións autonómicas para que coincidan coas xerais de xuño, á vez que subliñou que o candidato á Xunta da confluencia “decidirao o proceso de forma colectiva”.

En declaracións aos medios, Noriega recoñeceu que preguntou a Feijóo, durante o paseo polo Bosque de Galicia, no Monte Gaiás, se adiantaría os comicios e que este lle confesou que non o faría.

“Paréceme unha decisión respectable, agora tócanos a todos, desde a diversidade, expor as nosas vías políticas para unhas eleccións nas que hai dúas opcións: a continuidade de Feijóo como presidente ou un goberno liderado por unha marea”, sentenciou.

Sobre as palabras de Yolanda Díaz (EU) na Cadena Ser, descartándose como candidata para a confluencia e o feito de que apuntase que tampouco lle gustaría que fose Xosé Manuel Beiras (Anova) ao considerar que sería preferible un perfil independente, respondeu que non entrará “no xogo de designar quen pode ou non participar”, xa que considera que “ten que ser o propio proceso o que designe ao mellor candidato”.

“UNHA OPINIÓN” DE DÍAZ

Neste sentido, asegurou que el non está “para dar o plácet ou non plácet”. “Entendo que ten que ser ese espazo popular o que ten que determinar quen acaba liderando un proxecto que ten que ser de todos, un proxecto colectivo”, aseverou.

En canto a que Díaz se descarte e suxira que Beiras tampouco debería ser o candidato, Noriega sinalou que é “unha opinión” da dirixente de EU que el “respecta”, aínda que cre que “é o proceso o que ten que determinar quen van ser os candidatos”.

“Estamos a falar dun proxecto colectivo e, aínda que soe moi metafórico, non me toca a min designar quen pode ou non formar parte del”, resolveu.