Feijóo defende a mellora da educación e a liberdade nas aulas

O presidente da Xunta, Alberto Núñez Feijóo, volveu xustificar as probas de avaliación de 3º e 6º de Primaria, ao tempo que reiterou o seu compromiso con “seguir mellorando” a educación e a liberdade “de pais e alumnos” e advertiu o BNG, ao que acusa de “ideologizar” as aulas, que “non é bo enganar nin facer política cos nenos”.

“Ante o vicio de facer ideoloxía nas aulas está a virtude de enchelas de coñecemento”, sentenciou, en resposta á vicevoceira parlamentaria do BNG, actual voceira nacional da formación e candidata á Xunta, Ana Pontón, quen interveu en vez de Francisco Jorquera, e cargou contra as “reválidas” da Lomce, ao tempo que instou á Xunta a escoitar “o clamor” da comunidade educativa contra estas probas.

Pontón sinalou que Galicia é a comunidade con “maior abstención”, que situou en torno “ao 80 por cento” e aludiu á polémica xerada polo trato recibido por un menor en Becerreá (Lugo), que deixou o exame en branco e os pais da cal aseguran que foi apartado nunha aula.

Para a parlamentaria nacionalista, quen advertiu a Feijóo que non superará “a reválida” de outono, este tipo de actitudes supoñen “acoso” e “persecución ideolóxica”, así como “un síntoma de autoritarismo”. “Pode facer as piruetas dialécticas que queira, un striptis, pero a realidade é a que é, hai un clamor, unha maioría social que se expresou con contundencia e dixo non ás reválidas e á Lomce”, espetou Pontón.

“Por que prefire escoitar a Rajoy e non á comunidade educativa galega? É unha vergoña ter un Goberno que cruza a brazos mentres invaden as nosas competencias en educación cunha lei retrógrada”, continuou a deputada, antes de considerar “unha desfachatez” que o titular de Educación, Román Rodríguez, afirme que estas probas serven para coñecer as “necesidades educativas dos centros”, aos que o seu Executivo “recorta en medios e profesores”.

“LEVAR A IDEOLOXÍA ÁS AULAS”

No polo oposto, Feijóo replicou a Pontón que o seu Goberno continuará mellorando a sanidade e a educación, tamén no ámbito dos idiomas, e esgrimiu que baixou a taxa de abandono escolar, aumentaron “un 50 por cento” as prazas de FP e Galicia conta coas taxas universitarias máis baratas de España.

Ao tempo, ironizou con que os nacionalistas “se alarmen cun suposto clamor” fronte a estas probas “alentadas” por eles mesmos. “Nada que obxectar ás familias que deciden que os seus nenos non acudan a unha proba voluntaria”, esgrimiu, para concluír que lle resulta “máis difícil” aceptar que a oposición “minta”.

Así, advertiu que “é faltar á verdade” dicir que facer a proba é “obrigatorio” e que o “control” supón “un exame” baseándose no que se articulará “un ránking de centros de ensino público” ou que “forma parte da nota dos nenos” que -subliñou- “acudan a realizalos voluntariamente”.

“Non é bo enganar, facer política cos nenos, levar a ideoloxía ás aulas ou mentir coa porcentaxe de participación. O 90 por cento dos centros fixeron os controis e o 60 por cento dos alumnos; unha cousa é a que digan vostedes e outra a realidade”, constatou.

Do mesmo modo, advertiu ao BNG que non pode pedir a un presidente “democrático” na Cámara “que fai as leis”, que as “incumpra”. “É a proposta do programa electoral do BNG que se incumpran as leis que se fan nas Cortes Xerais? Dentro de moi pouco impedirán cumprir as leis que se aproban no Parlamento galego”, advertiu.

“NON CONTE CON MIN” PARA PEDIR A INSUMISIÓN

“Non conte comigo para pedir a insumisión”, agregou Feijóo, quen “agradeceu” a Ana Pontón que lle “anime” a superar “a reválida democrática de outubro”. “Vouna preparar ben e imos ver que din os pais e as nais de toda Galicia”, retou, antes de subliñar que son os nacionalistas “os que nunca aprobaron unha reválida”.

O presidente tamén enumerou varios países, entre eles Dinamarca, Malta, Noruega, Alemaña, Francia ou Lituania, nos que -asegurou- realízanse este tipo de probas. “Cre que toda Europa está equivocada e vostede acertada? Onte pasáronme esta foto con vostede ante San Caetano dos que participaron nese clamor do que fala. É o clamor do BNG?”, preguntou.

Feijóo apelou a ter “un pouco máis de respecto” por quen “voluntariamente” deciden facer estas probas e advertiu a Pontón de que, como nacionalista, debería “estar orgullosa” e “celebrar” cuestións como que Galicia sexa a comunidade “con máis profesores” por alumno”, con “máis prazas de comedor” que cando o bipartito gobernaba “con bonanza” ou con menor abandono escolar.

Dito isto, declarouse “presidente de todos galegos, os que enviaron aos seus fillos a facer as probas e os que non” antes de proclamar que o obxectivo de Educación e do conxunto do Goberno galego é “mellorar o sistema educativo, así como a liberdade dos alumnos e dos pais”.