As vítimas do Alvia reclaman unha investigación independente

A Asociación Plataforma Vítimas Alvia 04155 presentaron este martes na sede da Comisión Europea en Madrid, as máis de 270.000 sinaturas que recolleron a través da plataforma Change.org para que a institución europea faga público o informe sobre as causas que elaborou a Axencia Ferroviaria Europea (ERA) sobre o sinistro, no que faleceron 81 persoas e máis dun centenar resultaron feridas o 24 de xullo de 2013. Ademais, denunciaron a “falta de independencia” da Comisión de Investigación de Accidentes Ferroviarios (CIAF).

Os voceiros da asociación Cristina Liras, Rogelio Bernard, Javier García Municio e Laura del Moral, acompañados por outros afectados e a voceiro do BNG no Parlamento Europeo, Ana Miranda, concentráronse na porta da sede da Comisión Europea en Madrid cunha pancarta co lema “81 falecidos e máis de 140 feridos en Alta Velocidade. Esiximos verdade, Xustiza e responsabilidades políticas: PP, PSOE, Adif e Renfe”.

Tamén expuxeron carteis coas caras do presidente do Goberno en funcións, Mariano Rajoy, os ministros de Fomento e Xustiza en funcións, Ana Pastor e Rafael Catalá, respectivamente, o presidente da Xunta de Galicia, Alberto Núñez Feijóo, o secretario xeral do PSOE, Pedro Sánchez, e o exministro socialista de Fomento José Blanco aos que acusaron de “negar unha comisión de investigación”, tal e como se podía ler debaixo os retratos.

Liras e Bernardo – quen propuxo a iniciativa de recoller os apoios – foron os encargados de entregar dúas urnas de cartón nas que se han despositado as 270.000 sinaturas recollidas dende o pasado 17 de maio a través de Change.org para que a Comisión Europea faga público o seu informe sobre as causas do accidente, ao que se comprometeu en novembro de 2015 cando a Asociación viaxou ata Bruxelas para reunirse con representantes desta institución e da ERA.

“En realidade as vítimas non sabemos moi ben as causas do que sucedeu e queriamos ver se eles nos facían un informe e nos podían aclarar algo”, explicou Bernardo – pai dun dos falecidos – á prensa antes de entrar á delegación da Comisión Europea. “Dixéronnos que nos mandarían un informe o primeiro trimestre do ano -continuou- e agora din que por unhas causas legais non nos mandan o informe”.

Non obstante, a normativa europea de acceso público á información determina que a publicación se denegará “salvo que a súa divulgación revista un interese público superior”. Por iso, os afectados recolleron estas sinaturas e alegaron que iso demostra que a “xente está tan implicada neste caso” e, polo tanto, é de “interese xeral”, a pesar de que “o PP e o PSOE e o Estado non nos dan transparencia, nin nos deixa saír nos medios. Estamos moi silenciados”, dixo Bernardo.

“O que queremos é que se abra (o informe) cando antes posible para que tomen as medidas e poñan a seguridade que tería que ter esa curva (onde tivo lugar o accidente)”, resaltou.

A INVESTIGACIÓN DO ACCIDENTE FAINA UN “EQUIPO NON INDEPENDENTE”

Por outro lado, outro dos voceiros, Javier García Municio – tamén perdeu o seu fillo de 27 anos no accidente – recordou que dende o ano 2012, España está sancionada pola “falta de independencia” da CIAF, o organismo investigador de accidentes. Así pois, o voceiro lamentou que a investigación da “traxedia” do Alvia levouna a cabo un “equipo que non é independente” porque o conforma as “dúas empresas implicadas no accidente”, en referencia ao director de seguridade de Renfe e ao director de seguridade de Adif.

“É unha falta de independencia”, subliñou García Municio que, ademais, contradí o artigo 21 da directiva 2004/49, segundo apostilou, que recolle que “o equipo investigador de accidentes ten que ser independente do administrador da infraestrutura e do explotador desta, ou sexa de Renfe e de Adif”.

Neste sentido, lamentou que “un dos tres peritos xudiciais” plaxiase “ata 31 parágrafos” do informe deste organismo e que o xuíz Andrés Lago Louro se basease niso para “pechar en falso a instrución”.

“Haberá que empezar de novo e terá que facer a investigación un organismo totalmente independente e iso sería empezar de cero. Iso é importantísimo para nós, que o faga xente independente,”, concluíu García Municio.

BNG: “OCULTACIÓN DE CONCLUSIÓNS”

Por último, a eurodeputada de BNG Ana Miranda fixo fincapé que coa ocultación das conclusións do documento da Axencia Ferroviaria está a “tomar o pelo ás vítimas do Alvia e aos usuarios e usuarias e á sociedade en xeral”.

É máis, Miranda destacou que a Comisión Europea está sendo premida polo Goberno español para que non faga público este informe. Nesta liña, afirmou que é “curioso” que “seis días antes das eleccións” a Comisión lles vaia dar unha resposta sobre se se publicará ou non as causas. “Está claro que o Goberno está a facer o seu traballo e que está a premer á Comisión”, asegurou, para “evitar que saia ese cuestionamiento sobre a independencia”.

“Estou segura que este informe ten consecuencias legais e podería reabrir unha nova investigación se se determina que non houbo independencia”, sentenciou.