Abel Caballero reitera o seu apoio a Méndez Romeu un día antes das primarias

O alcalde de Vigo, Abel Caballero, reiterou o seu apoio ao candidato ás primarias do PSdeG José Luis Méndez Romeu, un día antes de que se celebre a votación e mostrouse convencido de que, se resulta gañador, “en cinco meses será o presidente da Xunta”.

Así se pronunciou en declaracións aos medios este venres en Vigo, onde volveu remarcar que Méndez Romeu é “un moi bo candidato” e “o mellor dos que se presentan” ás primarias, nas que só compite con Xoaquín Fernández Leiceaga.

Na mesma liña, afirmou que Méndez Romeu “será un magnífico candidato á Xunta e, como el dicía moi ben, en cinco meses será o presidente da Xunta”. “Se gaña as primarias, claro”, puntualizou Caballero, antes de remarcar que iso é unha cuestión que decidirán os propios militantes.

“Eu son moi respectuoso co voto dos militantes do Partido Socialista. Agora, creo que a opción mellor, na miña opinión, claramente é Méndez, sen ningunha dúbida”, insistiu. “Polo tanto vai ter o meu voto, ese é o apoio que eu dou”, rematou.