A Facultade de Ciencias Sociais e da Comunicación homenaxea a Manuel María coa “Resaca das Letras”

Con motivo da celebración do Día das Letras Galegas, na que se homenaxea a Manuel María, a Facultade de Ciencias Sociais e da Comunicación de Pontevedra acollerá, o vindeiro mércores 11 de maio, a “Resaca das Letras”.

O acto terá lugar no salón de actos da facultade na tarde do mércores. O programa dará comezo ás 16.30 h. co discurso inaugural de Xosé Baamonde, ao que seguirá a “Mesa periodismo” na que participarán representantes dos xornais PontevedraViva, Praza Pública e Sermos. Ás 17.10 h. terá lugar un acústico a cargo de Xosé Constenla ao que seguirá a intervención de ReiZentolo sobre as 17.40 h.

Tras un breve descanso, o acto continuará coa “Mesa ilustración”, ás 18.30 h., con Almudena Aparicio e Kiko da Silva. Ás 19.00 h. proxectarase un vídeo homenaxe a Manuel María previo a un recital de poesía con Navia Rivas en acústico. Tras entregar os premios do concurso, ás 20.00 h. terá lugar a última das intervencións con Poetarras, na que se combinará audiovisual e acústico.