Trasladan ao Hula a dous feridos tras unha colisión na estrada de Santiago

Os bombeiros de Lugo excarceraron este xoves unha condutora que quedou atrapada no interior do vehículo que conducía tras sufrir un accidente na estrada de Santiago, ao pasar a Ponte Nova do Miño. Segundo informa o 112, o sinistro produciuse sobre as 7,15 horas por unha colisión entre un turismo e unha furgoneta. Dúas persoas resultaron feridas, unha delas atrapada no interior dun dos vehículos.

Tras recibir a alerta dun particular, o 112 avisou a Urxencias Médicas e aos bombeiros da cidade. Ademais, foi solicitada a intervención dos axentes de Tráfico e de Protección Civil e os dous feridos foron trasladados polos servizos sanitarios ao Hospital Lucus Augusti (Hula).