Rueda asegura que o seu obxectivo non é facer mocións de censura e defende a de Pontecesures

O vicepresidente da Xunta e presidente do PP da provincia de Pontevedra, Alfonso Rueda, asegurou que o seu obxectivo “primordial” á fronte non é facer mocións de censura e defendeu a de Pontecesures para “recuperar estes meses perdidos con socios que non tiñan nada que ver — salvo- que querían que non gobernase o PP”.

Así o afirmou este xoves antes de participar nun acto en Vigo, ao ser preguntado polo acordo do PP, un dos dous edís de TeGa e os Independentes de Pontecesures (I.P.) para presentar unha moción de censura que desaloxará da Alcaldía desta localidade a Celia Tarela (BNG) -que goberna co PSOE e, ata fai uns meses, cos dous edís de TeGa-.

Rueda, que defendeu que o seu obxectivo “primordial” como presidente provincial non é facer mocións de censura senón renovar o partido e “poñelo en forma” para as próximas eleccións, recalcou que os populares están “a favor de propiciar a gobernabilidade” naqueles sitios onde gañaron as eleccións pero “os que non as gañaron se xuntaron para que non gobernase o PP”.

En relación a isto, manifestou que Pontecesures é “un bo exemplo”, porque se trata dun “goberno que rompeu en moi pouco tempo” -antes de cumprir o seu primeiro ano de lexislatura- e no que se empezan a dar “moitas discusións entre -grupos políticos- que non tiña nada que ver, só que o que querían é que non gobernase o PP”.

“Non se están a entender, non son capaces de levarse ben, polo tanto non son capaces de gobernar”, destacou, antes de insistir en que o PP exercerá a súa “posibilidade” e “dereito” a intentar formar goberno para tratar que nos tres anos que quedan de lexislatura “se note a marca dun goberno do PP cun alcalde do PP”.