O secretario de Estado de Seguridade insta a non baixar a garda ante o terrorismo

O secretario de Estado de Seguridade, Francisco Martínez, instou a “non baixar a garda” ante o terrorismo “autóctono, tanto de ETA como de Resistencia Galega”, -precisou nun acto na Coruña- como o yihadista.

Na toma de posesión do novo xefe superior de Policía de Galicia, o secretario de Estado de Seguridade apelou á “cooperación internacional” nesta materia, pero tamén á “eficacia” das Forzas e Corpos de Seguridade do Estado.

Ademais, Francisco Martínez subliñou a importancia da colaboración cidadá, a través da denuncia de casos dos que poidan ter coñecemento.

Xunto ao terrorismo, avogou por seguir avanzando na loita contra o narcotráfico ou a ciberdelincuencia. “Outro reto de primeira magnitude”, expuxo. Mentres, defendeu que debe seguir avanzándose nunha Policía “próxima” aos cidadáns.

O secretario de Estado de Seguridade fixo estas manifestacións na toma de posesión do novo xefe superior de Policía de Galicia, Manuel Vázquez López, até agora responsable da Unidade contra da Delincuencia Económica e Fiscal (UDEF).

INVESTIGACIÓNS COMO GÜRTEL OU FAMILIA PUJOL

Polo seu despacho, pasaron as principais investigacións ao redor da corrupción política. Investigou a cargos do PP polo caso Gürtel, á familia Pujol ou a fraude nos cursos de formación que afecta á Xunta de Andalucía, entre outros.

Ao acto, asistiron tamén o director xeral da Policía, Ignacio Cosidó; o vicepresidente da Xunta, Alfonso Rueda, e o delegado do Goberno en Galicia, Santiago Villanueva, entre outras autoridades.