O home que atopou o corpo de Asunta acepta 5 anos de cárcere por tráfico de drogas

O home que atopou o corpo de Asunta Basterra nunha pista forestal de Teo (A Coruña) o 22 de setembro de 2013, Alfredo B.G., aceptou cinco anos de cárcere por un delito de tráfico de drogas pola venda de cocaína, sustancia que foi achada tanto no seu domicilio como nun vehículo que conducía.

Segundo informou o Tribunal Superior de Xustiza de Galicia (TSXG), nunha vista celebrada este mércores o acusado mostrouse conforme á pena de cinco anos de prisión e unha multa de 12.454 euros, cunha responsabilidade subsidiaria de 30 días de traballo en beneficio da comunidade en caso de falta de pagamento.

No seu escrito de acusación, o fiscal solicitaba seis anos de cárcere para Alfredo B.G, que foi sorprendido o 18 de novembro de 2015 nas inmediacións do campo de fútbol de Cacheiras, en Teo, cun total de 50 pequenas bolsas termo seladas con 35,5 gramos de cocaína.

Segundo o documento do Ministerio público, o home ía destinar esta sustancia á súa venda, do mesmo xeito que outras bolsas, cun total de 63,4 gramos de cocaína, que lle foron incautadas no seu domicilio de Milladoiro, en Ames, tras ser detido.

Por estes feitos, o acusado, que segundo o acordo xudicial padece unha toxicomanía con varios anos de evolución, leva en prisión provisional desde o mesmo día do seu arresto en novembro de 2015. Ademais, fora condenado con anterioridade a dous anos de cárcere como autor doutro delito contra a saúde pública.