O fiscal de Medio considera controvertida a prórroga a Ence pero descoñece se se pode facer en funcións

O fiscal de Medio de Galicia, Álvaro García Ortiz, opinou este xoves sobre a prórroga concedida a Ence para continuar 60 anos na súa actual situación na ría de Pontevedra para considerar que se trata dun asunto “moi controvertido” tanto “socialmente” como “xuridicamente”, pero aseverou descoñecer se “un goberno en funcións o pode facer ou non”.

Neste sentido, nunha entrevista concedida á Radio Galega, recordou que “Ence, ou directivos de Ence” xa foron condenados por delito ecolóxico en 2002, pero obxectou que tería que coñecer o procedemento completo para “ter unha opinión fundada” sobre a prórroga.

“Como fiscal, non son capaz de dicir se un goberno en funcións o pode facer ou non”, remarcou o tamén presidente da Unión Progresista de Fiscais, máxime á vista de que “algo que parece máis sinxelo”, coma se un goberno en funcións ten ou non se que someter ás cámaras, está actualmente “en discusión”.

Noutra orde de cousas, volveu demandar a creación dunha Fiscalía anticorrupción en Galicia, tras admitir a controversia que supón que decidan a súa apertura os mesmos que poderían “ser investigados por ese órgano. “Por iso propugnamos a autonomía da Fiscalía do Ministerio de Xustiza”, explicou, tras sinalar que ambas as dúas institucións teñen “intereses absolutamente alleos”.

DIVISIÓN DE PODERES

Ao fío diso, García Ortiz resaltou que si existe “división de poderes” en España, aínda que exista, “como en todas as partes do mundo”, unha “tensión” entre os poderes.

Dito isto, acerca da influencia das decisións dos xuíces na vida política, apelou unha vez máis a diferenciar as responsabilidades políticas das xudiciais. “Hai comportamentos que son moralmente inadmisibles e outros que son penalmente reprobables”, distinguiu, ao tempo que subliñou que non se pode atribuír aos maxistrados o xuízo sobre os primeiros.

No caso concreto do exsecretario xeral do PSdeG José Ramón Gómez Besteiro, quen denunciou á xuíza Pilar de Lara pola decena de delitos que lle atribúe en dúas causas abertas contra el, este fiscal restou importancia ao caso: “son manifestacións lóxicas de quen se sente investigado e tivo que tomar decisións persoais supoño que dolorosas”.

Máis alá diso, o que defendeu é que “o sistema de recursos e de garantías dun cidadán se active de xeito inmediato” e que o proceso “sexa rápido”.

CAMBIOS NO SISTEMA

Adicionalmente, García Ortiz reclamou un cambio no sistema que “devolva aos xuíces o seu espazo natural”, o de xulgar, e traspase as instrucións aos fiscais.

“Queremos unha Lei de axuizamento criminal que modifique a repartición de papeis”, insistiu, ao tempo que reclamou máis “medios” para a Xustiza.