Nicanor Acosta ve un teatrillo no xuízo contra o seu activismo

O activista Nicanor Acosta, sancionado por protestar ante a sede do Partido Popular na Coruña, considerou que o proceso xudicial que se segue contra el non é un xuízo senón un “teatro con tres sainetes”, que se iniciou co desafiuzamento de Aurelia Rey e termina con esta última sanción.

Medio centenar de persoas, entre elas personalidades da esquerda e representantes dos movementos sociais, concentráronse este luns tras a pancarta ‘Múltannos a nós para asustarte a ti’ ante os xulgados de contencioso administrativo da Coruña.

A sala acolleu a vista na que este activista septuaxenario presentaba un recurso contra a Administración pola multa de 360 euros imposta pola súa participación nunha concentración ante a sede do PP coruñés.

Antes de acceder ao interior dos xulgados, Acosta volveu coller o megáfono -tal e como adoita facer nas concentracións nas que participa- para lanzar consignas como ‘O pobo ten dereito a pan, traballo e teito’ ou ‘Vivir é un dereito, ter casa tamén’.

“Isto non é un xuízo, é un teatro. É un teatro con tres sainetes”, asegurou en declaracións aos medios. Así, apuntou que primeiro foi “o intento de expulsión dunha muller anciá na rúa Feijóo”, en referencia ao desafiuzamento de Aurelia Rey, e polo que foi multado.

“CONTRA AS DECISIÓNS DO PP”

Pero, “hai un segundo sainete, que é o das preferentes”, continua Nicanor -multado tamén pola súa participación nunha concentración de afectados polas preferentes- e “o terceiro sainete” sería o proceso deste mesmo luns.

Precisamente, sobre este último caso, defendeu que acudiron ante a sede do PP para gritar “contra as decisións do PP, contra esas expulsións das casas”.

“Estabamos a reivindicar unha iniciativa lexislativa popular contra a reforma da lei hipotecaria, que tamén reivindica a Unión Europea, que chama a atención a España os últimos días”, dixo.

“Non sei se me acusan a min, ao megáfono, ou máis ben á presenza dos movementos sociais na rúa. Reivindican a figura de Fraga, que dicía que a rúa era súa. Estórballes que a rúa sexa dos cidadáns, aí é onde exercen a súa vida e onde teñen que exercer os seus lexítimos dereitos”, manifestou Acosta.

APOIO

O activista estivo arroupado, entre outros, por deputados de En Marea, como Antón Gómez-Reino. Así, Yolanda Díaz sinalou que Acosta “é un dos homes grandes do noso país, que está sempre en defensa das causas xustas”.

“É moi fermoso que Nicanor nos dea leccións e exemplos diarios. Nun mundo profundamente agresivo como este, soamente quédanos a solidariedade”, continuou.

O deputado Miguel Anxo Fernán-Vello, pola súa banda, incidiu no “apoio absoluto” ao septuaxenario, o cal amplía a todas “as persoas que ven afectadas no seu labor de activismo social”.