Deteñen en Vigo a un mozo por agredir á súa parella, que tivo que refuxiarse nun restaurante

Axentes da Policía Local de Vigo detiveron a un mozo de 33 anos de idade, P.W.C.B., veciño da cidade e de nacionalidade británica, como presunto autor dun delito de violencia de xénero.

Segundo informaron fontes policiais, os feitos tiveron lugar na madrugada deste luns, cando a Policía recibiu un aviso de que unha muller fora agredida e estaba refuxiada nun restaurante da rúa García Barbón.

Unha vez no lugar, os axentes entrevistáronse coa muller, que presentaba lesións nun ollo e que relatou que tivera unha discusión coa súa parella e que el a agredira. A vítima fuxiu do domicilio, pediu auxilio ás súas veciñas, e unha delas acompañouna ata o restaurante.

A Policía, grazas á descrición, que a muller fixo do seu presunto agresor, puido localizar ao mozo nas inmediacións do domicilio que compartían e procedeu á súa detención. A vítima, pola súa banda, foi trasladada a un centro médico.