Cidade da Cultura e Club Rio Natura Monbus Obradoiro cooperarán no impulso da cultura emprendedora en Galicia

A Fundación Cidade da Cultura e o Club Rio Natura Monbus Obradoiro veñen de acadar un acordo a favor do impulso da cultura emprendedora en Galicia. A través deste convenio, o Centro de Emprendemento do Gaiás acollerá o programa de actividades desenvolvidas polo Club de Empresas Obradoiro, iniciativas nas que se asociarán os valores do deporte e do emprendemento.

O acordo foi asinado esta mañá nas instalacións do Multiusos do Sar en Santiago de Compostela pola directora-xerente da Fundación Cidade da Cultura, Beatriz González Loroño, e o conselleiro da directiva do Rio Natura Monbus Obradoiro, José Ramón García, emprendedor tamén no seu día coa compañía tecnolóxica Blu:sens. O acto contou tamén coa presenza do adestrador do equipo Moncho Fernández.

A directora xerente da Cidade da Cultura lembrou que o Gaiás opera en tres eidos; a cultura, a tecnoloxía e o emprendemento; e destacou que, actualmente, douscentas persoas impulsan proxectos innovadores no Centro de Emprendemento, que, ademais desenvolve unha programación para apoiar a creación de novas empresas, actividades nas que o ano pasado participaron máis dun milleiro de persoas. O Club de Empresas Obradoiro, que a partir de agora pasará a denominarse Club de Empresas Obradoiro Gaiás, conta con 155 membros, a meirande parte deles pequenas e medianas empresas.

José Ramón García destacou a conexión entre os valores do mundo do deporte e da empresa, nos eidos da xestión de equipos, liderado ou motivación, áreas sobre as que xirarán as xornadas que o Club de Empresas Obradoiro Gaiás organizará na Cidade da Cultura. Na axenda de actividades están inicialmente previstos tres eventos. O 20 de abril terá lugar a cuarta edición do ‘Basket and Cheese’, desta volta centrado na xestión e posicionamento de marca; o 18 de maio será a quenda da xornada ‘Empresa e deporte’, en torno á xestión de rendemento e o 15 de xuño da ‘Basket & TICS: Ciclo vital do emprendedor’.