Abel Caballero di que o Concello de Vigo comparte o proxecto do polígono de Balaídos e informará positivamente

O Concello de Vigo emitirá informe “positivo” sobre o proxecto de consolidación do polígono de Balaídos, segundo avanzou este martes o alcalde da cidade, Abel Caballero, quen subliñou que o goberno local comparte “enteiramente” este proxecto, pola importancia que ten no desenvolvemento futuro da planta de PSA Peugeot Citroën.

Nunha rolda de prensa, o rexedor olívico confirmou que o Concello recibiu este luns o proxecto e que iniciou a tramitación pertinente para a súa publicación no BOP. A partir dese momento, ábrese un período de 20 días de exposición pública e para a presentación de alegacións, que serán recollidas pola propia casa do concello.

En todo caso, o alcalde avanzou que o informe municipal sobre este proxecto, un informe que é preceptivo e vinculante, será “positivo”, porque esa actuación permitirá consolidar e reordenar espazos no ámbito da factoría automobilística. Iso, á súa vez, suporá que PSA poida consolidar o seu proxecto K9 (as novas furgonetas) e optar a novos modelos.

Ademais, “resolveríase o problema da derrogación do PGOM”, sinalou Cabaleiro, en alusión á anulación, por parte do Tribunal Supremo, do Plan Xeral de Ordenación Municipal aprobado en 2008.