A Xunta analiza co sector de transporte interurbano o proxecto da nova estación de autobuses de Vigo

A directora xeral de Mobilidade, Helena de Lucas, e o delegado territorial da Xunta en Vigo, Ignacio López-Chaves, mantiveron hoxe unha xuntanza con representantes de empresas de transporte interurbano de pasaxeiros para abordar o proxecto para a nova estación de autobuses.

Esta reunión tivo como obxectivo trasladarlle ao sector unha explicación detallada do estado no que se atopa a tramitación do proxecto do complexo que acollerá entre outros servizos a estación intermodal, abordando así cuestións como o deseño ou a necesaria urbanización dos accesos por parte do municipio.

Os representantes do Goberno galego lembraron que a Xunta financiará integramente a nova estación de autobuses, e o Goberno de España costeou a terminal ferroviaria e está a impulsar o centro Vialia, polo que cómpre que o Concello de Vigo facilite os accesos axeitados a todo o complexo.

Helena de Lucas e López Chaves subliñaron que os accesos non só afectan á terminal de autobuses, xa que a falta deles xa impide actualmente que os viaxeiros de ferrocarril poidan acceder ao recinto da estación de tren empregando o autobús urbano. Precisaron que esta situación verase acentuada coa construción da estación de autobuses e o desenvolvemento do Centro Vialia que demanda o Concello.

Destacaron que o Concello de Vigo sitou a estación intermodal entre os proxectos prioritarios para a cidade que debían garantirse logo da anulación do Plan Xeral e que foi o propio Goberno autonómico o que puxo sobre a mesa a solución urbanística para facer isto posible. Polo tanto, reclamaron que a Administración local traduza ese interese prioritario na estación en traballo e implicación, no ámbito das súas competencias, para garantir que a cidade teña unha estación intermodal cos accesos precisos.