A Deputación da Coruña colabora co proxecto europeo Landcare

Desde hoxe venres ata o martes 12 de abril, un grupo de 15 profesores e estudantes universitarios de varios países (Portugal, Italia, Grecia, Alemaña, México, India e España) visitarán diferentes áreas da provincia da Coruña como a contorna rehabilitada da mina das Pontes, o monte do Pedroso en Santiago ou as dunas de Corrubedo, en Ribeira, para estudar iniciativas de recuperación de terreos degradados dentro do programa europeo Landcare, no que colaboran a Deputación da Coruña e a Universidade de Santiago.

Para Galicia, e para a provincia da Coruña en particular, o proxecto permitirá formar técnicos que contribúan a preservar ou recuperar os valiosos ecosistemas que alberga. Neste sentido, a contorna rehabilitada da mina de As Pontes que visitan durante a xornada de hoxe “é un dos maiores retos ambientais do mundo”, segundo afirma o profesor da USC Agustín Merino, coordinador da iniciativa, que considera que “constitúe un excelente laboratorio para a formación de especialistas”.

Santiago e Corrubedo

A recuperación de terreos e masas forestais afectadas por incendios será outra das temáticas abordadas, que os especialistas coñecerán de primeira man o vindeiro luns no monte do Pedroso en Santiago. O vindeiro martes, 12 de abril, os participantes neste proxecto europeo coñecerán as actuacións de conservación realizadas no sistema dunar de Corrubedo.

Landcare é un proxecto de Innovación Educativa, cuxo obxectivo é mellorar as capacidades para o ensino da Restauración de terreos degradados. Para iso cóntase coa colaboración de expertos internacionais. A elaboración dun módulo de ensino a través de internet (e-learning) é outra das estratexias.
Durante o proxecto estúdase como restaurar terreos degradados por incendios, zonas de minas, humidais ou ribeiras de rio afectadas pola deforestación ou as zonas de costa, ameazadas polo aumento do nivel de mar e a actividade humana.