Xunta e Concello de Santiago constituirán unha comisión de seguimento dos conflitos de convivencia en edificios de vivendas

A Xunta, a través do Instituto Galego da Vivenda e Solo (IGVS), e o Concello de Santiago constituirán unha comisión de seguimento dos conflitos de convivencia en edificios de vivendas. Este organismo estará dedicado a levar un seguimento das familias responsables de diversos conflitos entre veciños que se están rexistrando nalgunhas vivendas de Santiago de Compostela.

A decisión de crear esta comisión tomouse no marco dunha reunión entre o director do IGVS, Heriberto García Porto, e a concelleira de Política Social, Diversidade e Saúde do concello de Santiago de Compostela, Concepción Fernández. A reunión, convocada polo IGVS, serviu para expoñerlle á representante municipal a necesaria coordinación do IGVS e os servizos sociais municipais nalgúns conflitos de convivencia detectados en edificios de vivendas de promoción pública.

A comisión, semellante á creada con anterioridade noutros concellos, como o da Coruña, dedicada a atender os problemas en Mesoiro, estará integrada por tres representantes do IGVS e tres do concello; reuniranse mensualmente para facer un seguimento directo de todos os casos de conflictividade entre veciños que se presenten na capital galega.