Suspéndese o xuízo por prevaricación a un exedil do PP de Santiago

O xuízo por prevaricación contra o exconcelleiro do PP de Santiago Albino Vázquez pola denuncia presentada por un policía local foi suspendido ata o 8 e 22 de abril debido á imposibilidade de reproducir na sala as gravacións das escoitas, procedentes da instrución da ‘Operación Pokémon’. Tanto a Fiscalía, como a acusación, pediran a reprodución íntegra desta proba.

Nesta causa, a vista da cal estaba prevista para este martes, permanece acusado o que foi concelleiro de Mobilidade, Seguridade Cidadá, Tráfico, Grúa e ORA do Concello de Santiago cando era rexedor compostelano Ángel Currás (que no seu día substituíu a Gerardo Conde Roa, o cal dimitiu tras ser condenado por un delito fiscal).

A Fiscalía pide, no seu escrito de acusación, nove anos de inhabilitación especial para o acusado por un delito de prevaricación administrativa, por ditar, a sabendas, unha resolución para substituír o xefe de Policía accidental que, segundo recolle o escrito, é contraria á normativa interna. Ademais, o exedil depositou 6.000 euros en concepto de fianza para, no seu caso, facer fronte á indemnización que piden defensa e fiscala.

“Coñecedor de que carecía de competencias” para iso, di a Fiscalía, “ditou un decreto onde, coa intención claramente de prexudicar” ao axente José Antonio C.F., “nomea sen xustificación ningunha, como substituto” do xefe accidental da Policía a unha persoa que “carecía da categoría necesaria” para o desempeño da función”.

Pola súa banda, a Audiencia Provincial da Coruña sobreseu a causa no que respecta ao suposto delito de coaccións, que a Fiscalía tamén atribuíu no seu escrito (parte agora anulada) ao exedil e á que era directora das forzas de seguridade no Concello. Deste xeito, aínda que o Ministerio Fiscal non modificou a súa acusación, o que foi concelleiro do Concello compostelano non será xulgado por esta cuestión, como explicou o avogado da acusación.

Non obstante, si se incluíron como probas as gravacións telefónicas que “é importante escoitar” para poder “probar a prevaricación”, en opinión do avogado do policía local, Xosemaría Rodríguez, como dixo a preguntas dos medios a saída do xulgado.

CONVERSACIÓNS DA POKÉMON

As conversacións refírense ás escoitas que se interceptaron no marco da ‘Operación Pokémon’ e que a xuíza Pilar de Lara enviou á instrutora deste caso. Segundo o informe que elaborou Vixilancia Aduaneira, o exconcelleiro compostelano Albino Vázquez recorreu ao que foi asesor municipal Ángel Espadas para que pedirlle o “favor” de que chamase á Casa do concello compostelano de forma “anónima”, dende unha cabina, para denunciar o policía local, que despois denunciou acoso (parte que non será xulgada) e prevaricación.

A remisión do informe elaborado por Vixilancia Aduaneira e das gravacións supuxo, de feito, un xiro na instrución sobre o caso do policía local, posto que a xuíza retrotrae ao inicio da instrución a causa, que sobresera provisionalmente con respecto á maioría dos investigados (antes imputados). Entre eles incluíu, entón, o exalcalde e agregou ao seu exasesor -que foi cazado ao volante durmido e ebrio, motivo polo que saíu da candidatura do PP nas municipais de 2011-, pero ningún de sentará no banco.

Non obstante, Espadas si foi chamado a declarar en calidade de testemuña a este xuízo e, finalmente, terá que acudir (nesa condición) o próximo 8 de abril. Nesa primeira xornada do xuízo, de feito, está previsto que se reproduzan as conversacións e declaren todas as persoas -en calidade de testemuñas- que participaron nelas: o propio acusado, a que era directora das forzas de seguridade e o exasesor de Conde Roa.

“Entendemos que, de cara a probar a prevaricación, tamén é importante escoitar estas conversacións, que había unha serie de actuacións paralelas ao propio acto en si de prevaricación que conduce a pensar que todo isto tiña unha motivación”, manifestou o avogado da acusación.

Pola súa banda, a representación de Albino Vázquez, Martín Fuentes, indicou que a Fiscalía “non manifestou nada” ao respecto do escrito de acusación (onde mantén un suposto delito que anulou a Audiencia Provincial) e rexeitou pronunciarse máis sobre esta cuestión.

MÁIS DUNHA HORA PARA O ATRASO

O acusado e as testemuñas, así como o policía que presentou a denuncia, chegaron antes das 10,00 horas deste martes aos xulgados da capital compostelana, momento para o que estaba previsto que se iniciase a vista, que se atrasou para as 10,30 horas. Logo, a xuíza chamou a Fiscalía e partes para abordar a presentación das probas.

Tras máis dunha hora de consulta ás partes, e dado que tanto a acusación como a Fiscalía queren que se reproduzan as escoitas telefónicas, o xuízo quedou aprazado por problemas técnicos para escoitar as gravacións.

A nova vista quedou aprazada para os próximos 8 e 22 de abril. Na primeira xornada, declararán as persoas involucradas nas conversacións, o acusado e un dos peritos; mentres que o resto das probas e testificales quedarán para o segundo día para o que se reservou a sala.

Albino Vázquez formalizou a súa renuncia como concelleiro compostelano o 18 de febreiro de 2013 despois de declarar ante a xuíza que instrúe a ‘Operación Pokémon’ -e o seu derivadas-, entón en calidade de imputado tamén neste caso (agora sería investigado) e que lle fose imposta unha fianza de 15.000 euros. Na instrución da xuíza de Lugo, foi imputado por suborno, revelación de información privilexiada e tráfico de influencias.